१२ चैत, काठमाडौं । टेकुस्थित शुक्रराज ट्रपिकल तथा सरुवा रोग अस्पतालले पठाएको नमुनामा थप एकजनामा कोरोना भाइरस ( कोभिड १९ ) पोजेटिभ देखिएको छ । यससँगै नेपालमा कोरोना संक्रमितको संख्या तीन पुगेको छ ।
केहि हप्ता अगाडि चीनबाट आएका एक विद्यार्थीमा कोरोना संक्रमन देखिएको थियो । उनि सन्चो भएर घर फर्किसकेका छन् । ४ चैतमा फ्रान्सबाट कतारको दोहा हुँदै नेपाल आएकी १९ वर्षीया युवतीमा पनि संक्रमण देखियो । उनको शुक्रराज ट्रपिकल अस्पतालमा उपचार भइरहेको छ । नेपालमा अहिलेसम्म ६८७ जनाको नमुना परीक्षण गरिएको छ, जसमध्ये ६८४ को रिपोर्ट नेगेटिभ आएको छ । अस्पतालका सुचना अधिकारी राजेशकुमार गुप्ताले एक व्यक्तिको रिपोर्टमा पोजेटिभ आएको बताएका छन् ।
विश्वभरि महामारीका रुपमा फैलिँदै गएको कोरोना भाइरसको सङ्क्रमणको कारण बुधबारसम्म १८ हजार ८ सय ९२ व्यक्तिको मृत्यु भएको छ ।
विश्व स्वास्थ्य सङ्गठनले सार्वजनिक गरेकोे विवरणअनुसार संंसारभरि ४ लाख २२ हजार ६ सय १४ जना कोरोना भाइरस सङ्क्रमित भएका छन् ।
सङ्क्रमित व्यक्तिहरुमा १ लाख ८ हजार ८ सय ७९ जना उपचारपछि घर फर्किएका छन् । २ लाख ९४ हजार ८ सय ९४ व्यक्ति हाल सङ्क्रमित रहेका छन् । कोरोना भाइरस कोभिड–१९ को सङ्क्रमण हालसम्म १९२ भन्दा बढी देशमा देखा परीसकेको छ ।
चीनको हुबेई प्रान्तको उहान शहरबाट शुरु भएको कोभिड–१९ लाई विश्व स्वास्थ्य सङ्गठनले ‘विश्वव्यापी महामारी’को सङ्ज्ञा दिएको छ ।
कोरोना भाइरस सङ्क्रमणबाट चीनभरी ३ हजार २ सय ८१ व्यक्तिको मृत्यु भएको छ भने, ८१ हजार १७१ जना सङ्क्रमित रहेका छन् । बुधबार प्राप्त समाचारअनुसार ७३ हजार ६ सय ५० व्यक्ति उपचारपछि घर फर्किएका छन् । अब चीनमा जम्मा ४ हजार २ सय २८ जनामा मात्र कोरोनाको संक्रमण रहेको छ ।
हाल कोरोना भाइरसका कारण अत्यन्त प्रभावित भएको इटालीमा यस रोगको सङ्क्रमणको कारण ६ हजार ८ सय २० व्यक्तिको मृत्यु भएको छ । हाल ६९ हजार १ सय ७६ जना सङक्रमित रहेका छन् । मङ्गलबार प्राप्त एक समाचारअनुसार ८ हजार ३ सय २६ व्यक्ति उपचारपछि घर फर्किएका छन् ।
इरानमा कोरोना भाइरसको सङ्क्रमणको कारण ९ हजार ९ सय ४३ व्यक्तिको मृत्यु भएको छ । हाल १३ हजार ९ सय ६३ जना सङक्रमित रहेका छन् । ८ हजार ९ सय १३ व्यक्ति उपचारपछि घर फर्किएका बताइएको छ ।
कोरोना भाइरसको सङ्क्रमणको कारण स्पेनमा २ हजार ९ सय ९१ व्यक्तिको मृत्यु भएको छ । हाल २९ हजार ५ सय ४२ जना सङक्रमित रहेका छन् । बुधबार प्राप्त एक समाचारका अनुसार तीन हजार ७ सय ९४ व्यक्ति उपचारपछि निको भएर घर फर्किएका छन् । स्पेनमा २४ घण्टाको अवधिमा मात्रै ६ सय ८० जनाको कोरोना भाइरसको कारण मृत्यु भएको छ ।
संयुक्त राज्य अमेरिकामा कोरोना भाइरस सङ्क्रमणका कारण ७ सय ७५ व्यक्तिको मृत्यु भएको छ । हाल ५३ हजार ६ सय ६५ जना सङक्रमित छन् भने, ३ सय ७८ जना उपचारपछि निको भएर घर फर्किएका छन् ।
यसै गरी २४ घण्टाको अवधिमा विश्वभर ४३ हजार ७ सय ६९ जना नयाँ कोरोनाका संक्रमित थपिएका छन् भने २ हजार ३ सय ७८ जना संक्रमितले ज्यान गुमाएका छन् । जम्मा संक्रमित मध्ये १ लाख ८ हजार ८ सय ७९ जना उपचारपछि निको हुँदा १३ हजार ९५ जना गम्भीर अवस्थामा कोरोनासँग जुधिरहेका छन् ।
अपडेट :
कोरोना संक्रमित युवा कतारबाट आएको निश्चित
माउण्ट बुद्ध मिडिया द्वारा सञ्चालित सल्लेरी खबर सूचना विभागमा २७ नम्बरमा दर्ता रहेको छ ।