२६ साउन, काठमाडौँ । समय तालिका अनुसार निजी आवास पुनर्निर्माणको काम नगर्ने भूकम्पपीडितहरू लाभग्राही सूचीबाट धमाधम हट्न थालेका छन् ।राष्ट्रिय पुनर्निर्माण प्राधिकरणले निजी आवास पुनर्निर्माणअन्तर्गत लाभग्राहीमा परेका भूकम्पपीडितलाई २१ असारसम्म अनुदान सम्झौता गर्न समय तोकेको थियो । समयसीमाभित्र सम्झौता नगर्ने ५७ हजार ३०९ ले अनुदान सम्झौता गरेका थिएनन् भने प्राधिकरणले उनीहरूलाई सूचीबाट हटाएको छ ।
यस्तै, २०७६ असार मसान्तसम्म पहिलो किस्ता नलिने भूकम्प पीडित पनि लाभग्राहीको सूचीबाट हटेका छन् । अनुदान सम्झौता गरेर पनि पहिलो किस्ता नलिने ५ हजार ५४० लाभग्राही सूचीबाट हटेका हुन् ।
प्राधिकरणले गत साउन पहिलो साता निजी आवास पुनर्निर्माणका लागि लाभग्राहीको सूचीमा समावेश भएर २१ असार २०७६ सम्म सम्झौता नगर्ने र असार मसान्तसम्म पहिलो किस्ता नलिने ६२ हजार ८४९ भूकम्पपीडितलाई लाभग्राहीको सूचीबाट हटाउने निर्णय गरेको थियो ।
प्राधिकरणले समयमा अनुदान सम्झौता नगर्ने र पहिलो किस्ता नलिनेका लागि अनुदान सम्झौता गर्ने र पहिलो किस्ता दिने कार्य स्थगित गर्न सबै निकायहरूलाई यसअघि नै निर्देशन दिएको थियो ।
प्राधिकरणको समय तालिकाअनुसार काम नगर्ने भूकम्प पीडित अझै ठुलो सङ्ख्या पनि हट्ने देखिएको छ । असार मसान्तसम्म पहिलो किस्ता लिएकाले कात्तिक मसान्तसम्म दोस्रो किस्ता र माघ मसान्तसम्म तेस्रो किस्ता लिनुपर्ने तालिका तय भएको छ ।
प्राधिकरणको पछिल्लो तथ्याङ्कअनुसार भूकम्पबाट प्रभावित ४ लाख २४ हजार ९७७ लाभग्राहीले अनुदान लिई घर निर्माण सम्पन्न गरेका छन् । अन्य २ लाख १४ हजार ३१४ लाभग्राहीका घर पुनर्निर्माण धमाधम भइरहेको छ ।
प्राधिकरणले पुनर्निर्माण सम्पन्न र बनाउँदै गरेका सहित कुल ६ लाख ४४ हजार २९१ घर पुनर्निर्माणको प्रक्रियामा रहेको जनाएको छ । उक्त सङ्ख्या पुनर्निर्माण गर्नुपर्ने घरको सङ्ख्याको ८३ प्रतिशत उपलब्धि हो । अनुदान सम्झौता गरेका लाभग्राहीको सङ्ख्या ७ लाख ७३ हजार ४४७ छ ।
प्राधिकरणले अनुदान सम्झौता गरेका मध्ये ७ लाख ६५ हजार २२१ ले पहिलो किस्ता बुझेका छन् भने ५ लाख ९९ हजार ४३९ ले दोस्रो किस्ता बुझिसकेका छन् । तेस्रो किस्ता बुझ्ने लाभग्राहीको सङ्ख्या ४ लाख ७४ हजार ११९ छ ।
राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले चालू आर्थिक वर्षभित्रै निजी आवास पुनर्निर्माणको मुख्य कार्य सम्पन्न गर्ने बताएका छन् । यो समाचार आजको राजधानी दैनिकमा टेनिस रोका लेखेका छन् ।
