६ साउन, काठमाडौँ l प्रधानमन्त्री केपी शर्मा ओलीले डा.सन्दुक रुइतले आँखाको उपचार क्षेत्रमा चमत्कारिक काम गरेको भन्दै प्रशंसा गरे ।
तिलगंगा आँखा प्रतिष्ठानको २५ औँ वार्षिकोत्सवको अवसरमा सञ्चालन कार्यक्रममा उपस्थित जनाउँदै प्रधानमन्त्री ओलीले अस्पतालका निर्देशक समेत रहेका रुइतको खुलेर प्रशंसा गरेका छन् ।
प्रधानमन्त्री ओलीले भने, ‘डा.रुइतले गौरवपूर्ण इतिहास सम्झाउनु भएको छ l आँखा उपचारको लागि विश्वको अग्रणी संस्था स्थापना गरेर धेरैलाई नयाँ संसार देखाउन सफल हुनुभएको छ।’
डा.रुइतको प्रयासमा अन्धोपनका धेरै बिरामीहरूले नयाँ उज्यालो संसार देख्न पाएको प्रधानमन्त्री ओलीको भनाइ छ । तिलगंगा आँखा अस्पतालको प्रेरणाबाट धेरैले सेवामुखी अस्पताल खोल्ने प्रेरणा लिनु पर्ने प्रधानमन्त्री ओलीले बताएका छन् ।
स्थापनाको २५ वर्षमै धेरै उपलब्धि प्राप्त गर्न सकेको भन्दै प्रधानमन्त्री ओलीले रुइत र अस्पताललाई बधाई दिएका छन् । उनले भने, ‘तपाईँहरूका प्रयास र सेवा अनुकरणीय छन् ।’ अनुसन्धान, तालिम र उपचारका लागि अस्पतालले सरकारका तर्फबाट यथेष्ट सहयोग पाउने उनले बताएका छन् ।
