३ साउन, काठमाडौं । बार्सिलोनाका प्रशिक्षक इर्निस्टो भाल्र्भेडेले भर्खरै क्लबमा आबद्ध भएका दुई स्टारबाट क्लब र समर्थकले निक्कै अपेक्षा राखेको बताएका छन् । बार्सिलोनाले हालै मात्र एन्टोइन ग्रिजमनलाई १ सय ७ मिलियन पाउन्डमा र फ्रेन्की डी जोङलाई ६७ मिलियन पाउन्ड तिर्दै क्लबमा भित्राएका थिए ।
फ्रेन्कीलाई टोलीको लागि भविष्यको भरपर्दो खेलाडीका रुपमा लिएको छ । त्यस्तै , सुपर स्टार ग्रिजमनमाथि आफुलाई प्रमाणित गर्ने चुनौति रहेको छ ।
२८ वर्षे ग्रिजमनबाट भाल्र्भेडेले निक्कै अपेक्षा गरेको बताएका छन् । ‘ला लिगाको उनीलाई अनुभव छ । डि जोङलाई भन्दा उनलाई यहाँको स्तर थाहा छ,’ उनले भने, ‘उनी तीब्र गतिका खेलाडी हुनुका साथै उत्कृष्ट फिनिसर पनि हुन् । हामीले उनीमाथि ठूलो भरोसा गरेका छौं । उनी जस्तो खेलाडी टोलीमा हुनुको महत्व हामीलाई राम्ररी थाहा छ । ‘
