१ श्रावण, सल्यान – असार १० गते उद्घाटन भएको बागचाैर नगरपालिकाको पाँचाै नगर सभा सम्पन्न भएको छ । करीब २० दिन चलेको उक्त सभा विभिन्न विषयमा छलफल तथा निर्णय गरी समापन भएको हो ।
नगर सभामा नगर उप-प्रमुख तथा बजेट योजना तर्जुमा संयोजक कल्पना पुनले बजेट, नगर स्तरीय योजनाहरु, वडा स्तरीय योजनाहरु र आर्थिक विनियोजन ऐन प्रस्तुत गरेका थिए ।
कार्यक्रमका सभाध्यक्ष तथा बागचौर नगरपालिका नगर प्रमुख लोकमान बुढाथोकी सभामा बोल्दै योजना तथा नितिका कार्यक्रम बनाउँदै गर्दा छलफल तथा अन्तरक्रियाबाट टुङ्गो लागेकोमा आफुले खुसी व्यक्त गरे । योजनाहरु सम्पन्न गर्दा यो वर्ष केही ढिला भएकाले अब आउँदो आर्थिक वर्ष वडाहरुमा प्राविधिक राखिने उनले बताए ।
बागचौर नगरपालिकालाई समृद्ध नगर बनाउन राम्रो काम गर्नेलाई सम्मान गर्ने उद्देश्यले नगर भित्र रहेर विभिन्न क्षेत्रमा उत्कृष्ट नतिजा हासिल गर्ने विद्यालय, शिक्षक शिक्षिका तथा विद्यार्थीलाई सम्मान गरेका थिए ।
सम्मान कार्यक्रममा शिक्षातर्फ उत्कृष्ट विद्यालय सरस्वती माध्यमिक विद्यालय, देउपुरीडाँडाले सम्मान पाउँदा खेलकुद विधाको उत्कृष्टताको सम्मान श्री जनकल्याण नमुना माध्यमिक विद्यालय थारमारेले पायो ।
त्यसैगरी उत्कृष्ट शिक्षिका देवकली बस्नेत घोषित हुँदा उत्कृष्ट विद्यार्थीको सम्मानबाट बालकन्या मावि टाट्केका रोशन केसी सम्मानित भए ।
कार्यक्रममा विद्यावारिधि प्राप्त गर्ने शिक्षक डा. पुर्ण बहादुर भण्डारीलाई पनि सम्मान स्वरुप दोसल्ला,कदर प्रमाणपत्र तथा नगद पुरस्कार प्रदान गरिएको थियो ।
