२५ असार, काठमाडौं ।आइसिसी विश्वकप क्रिकेट २०१९ अन्तर्गत पहिलो सेमिफाइनलको खेलमा न्युजिल्यान्डद्वारा भारतलाई २४० रनको लक्ष्य प्रस्तुत गरेको छ।
मंगलबार म्यानचेस्टरमा टस जितेर पहिले ब्याटिङ थालेको न्युजिल्यान्डले ४६.१ ओभरमा ५ विकेटको नोक्सानीमा २११ रन बनाउदा वर्षा बाधक भएको थियो। त्यसपश्चात बुधबारसम्मका लागि खेल स्थगित भएको थियो।
बुधबार ४६.१ ओभरबाट फेरि सुरु भएको खेलमा न्युजिल्यान्डले ५० ओभर खेल्दा ८ विकेट गुमाएर २३९ रन जोड्यो। न्युजिल्यान्डले ३.१ ओभरमा २९ रन जोड्दा थप ३ विकेट गुमायो।
रोश टेलरले ७४ रन जोड्ने क्रममा ९० बलमा ३ चौका र १ छक्का प्रहार गरे । टम लाथम १० रनमा आउट भए। मिचेल सान्टनरले नटआउट १० रन जोडे।
त्यसअघि ओपनर मार्टिन गुपटिल १ रनमै आउट भए। हेनरी निकोल्सले ५१ बलको सामना गर्दै २७ रन बनाए । कप्तान केन विलियमसनले ९५ बलको सामना गर्दै ६ चौकाको मद्दतमा ६७ रन जोडे । जेम्स निसम १२ रन र कोलिन डे ग्रान्डहोम १६ रन जोडेर आउट भए।
भारतका लागि भुवनेश्वर कुमारले ३ विकेट हात पारे ।
