१५ असार, जाजरकोट l जाजरकोटको कुशे गाउँपालिकाले ३०० दलित परिवारलाई निःशुल्क सौर्य उपकरण (सोलार) वितरण गरेको छ । गाँउपालिकाको पहलमा वैकल्पिक ऊर्जा प्रवद्र्धन केन्द्रले पूर्ण अनुदानमा सौर्य उपकरण प्रदान गरेपछि दलित समुदायका घर झिलीमिली हुने भएका छन् ।
निःशुल्क सौर्य उपकरण पाएका दलित परिवार खुशी भएका छन् । वर्षौदेखि अँध्यारोमा रात बिताउँदै आएका कुशे–३ अर्छानी दतीवरका चुके कामीले पहिलोपल्ट सोलार पाउँदा निकै खुशी लागेको बताए । उनले राति घरायसी कामकाज गर्न र केटाकेटीलाई पढ्न सहयोग पुग्ने बताए ।
त्यस्तै कुशे–५ खुर्पाकी रञ्जना बादीले निःशुल्क सोलार पाउँदा निकै खुसी लागेको बताए । उनले बत्ती नहुँदा वर्षौँदेखि टुकी र दियालोको भरमा गुजरा चलाउँदै आएको जानकारी दिए ।
“छोराछोरीलाई पढ्न सजिलो हुने भएको छ, राति घरको कामकाज गर्न, खाना पकाउन सजिलो भएको छ”, उनले खुशी व्यक्त गर्दै भने ।
बिजुली बत्ती नहुँदा अँध्यारोमा बस्न बाध्य विपन्न दलित परिवारलाई निःशुल्क सोलार प्रदान गरिएको गाउँपालिकाका अध्यक्ष हरिचन्द्र बस्नेतले बताए ।
बत्ती नहुँदा टुकी, दियालो र मैनबत्तीको सहारामा पढ्न बाध्य दलित समुदायका बालबालिकालाई सोलारको उज्यालोले अध्ययनमा निकै फाइदा पुग्ने अध्यक्ष बस्तेको भनाइ छ ।
“गाँउपालिकामा ६६० दलित परिवार छन् । तीमध्ये अतिविपन्न ३०० परिवारलाई सोलार वितरण गरेका छौँ भने बाँकी परिवारलाई यसै वर्ष सोलारका लागि वैकल्पिक ऊर्जासँग आवश्यक पहल गर्छु ।”
वैकल्पिक ऊर्जा प्रवद्र्धन केन्द्रले चालू आर्थिक वर्षमा कुशेमा ३०० र बारेकोटमा ३०० दलित परिवारका लागि निःशुल्क सौर्य उपकरण प्रदान गरेको हो । बीस वाटको सोलारको बजार मूल्य रु १० हजार ५०० पर्छ । (रासस)
