काठमाडौँ उपत्यकामा भएको श्रृंखलावद्ध सिरिन्ज आक्रमणको घटनामा संलग्नलाई महानगरीय प्रहरी परिसर काठमाडौँले बिहीबार राति १० बजे महाराजगन्जबाट पक्राउ गरेको छ ।
रामेछाम घर भई हाल महाराजगन्जमा रेस्टुरेन्ट चलाउँदै आएका ३० वर्षीय सन्तोष कार्कीलाई प्रहरीले विभिन्न युवतीहरूलाई सिरिन्ज आक्रमण आरोपमा पक्राउ गरेको हो । उनी ५ वर्ष दुबई बसेर फर्किएका व्यक्ति हुन् ।
प्रहरी बयानमा कार्कीले रमाइलोका लागि सिरिन्ज आक्रमणमा गरेको बताएका छन् । कार्कीले सिरिन्जले नभई काँटीले घोचेको बताएका छन् । उनले प्रारम्भिक बयानमा आफ्नो अपराध स्वीकार गरेको प्रहरी स्रोतले दाबी गरेको छ । प्रहरीले शुक्रवार दिउँसो पत्रकार सम्मेलन गरेर उनलाई सार्वजनिक गरेको छ ।
केही हप्ता देखि काठमाडौँ र भक्तपुरमा श्रृंखलावद्ध सिरिन्ज आक्रमण भएको थियो । केही दिन अगाडि बनेपामा पनि यस्तै प्रकृतिको घटना घटेको थियो । सिरिन्ज आक्रमणको एकपछि अर्को सिकार भएका ९ महिलाको शुक्रराज ट्रपिकल सेन्टर टेकुमा उपचार भइरहेको छ । उनीहरूलाई एचआईभी विरुद्धको एआरटी औषधि चलाइएको छ भने हेपाटाइटिस बी विरुद्धको भ्याक्सिन पनि दिइएको छ ।
