वीरगन्जमा मोटरसाइकल चोरी गर्ने २ जना पक्राउ

२४ जेठ, वीरगन्ज l नेपाल प्रहरीले मोटरसाइकल चोरी गरी भाग्दै गरेको अवस्थामा दुईजनालाई पक्राउ गरेको छ l

पक्राउ पर्नेमा वीरगन्ज महानगरपालिका-१० का २६ वर्षीय अम्मेन्द्रकुमार पटेल र सोही महानगरपालिका-२० का २७ वर्षीय धीरेन्द्र महतो रहेका छन् । प्रहरीले उनीहरूलाई फरक फरक स्थानबाट पक्राउ गरेको हो l

वीरगन्ज महानगरपालिका-११ रानिघाटमा पार्किङ गरी राखेको ना ५५ प ७१७४ नम्बरको मोटरसाइकल र वीरगन्ज महानगरपालिका-१० आदर्शनगर डेरा गरी बस्ने नवीन झाले आफ्नो घरअगाडि पार्किङ गरी राखेको ना४ प ४०५७ नम्बरको मोटरसाइकल चोरी भएको थियो l

मोटरसाइकल चोरी भए पश्चात् जिल्ला प्रहरी कार्यालय पर्साबाट खटिएको प्रहरी टोलीले ना४ प ४०५७ नम्बरको मोटरसाइकलसहित पटेललाई आदर्शनगरबाट र ना५५प ७१७४ नम्बरको मोटरसाइकलसहित महत्तोलाई रानीघाटबाट पक्राउ गरेको हो । उक्त घटनाबारे थप अनुसन्धान भइरहेको प्रहरीले बताएको छ l

सल्लेरी खबर