१० जेठ, सुर्खेत । प्रहरीले २० वर्षपछि एक फरार अभियुक्तलाई पक्राउ गरेको छ ।
पक्राउ पर्नेमा सुर्खेत लेकबेँसी नगरपालिका–९ साँझेचौरका हर्खबहादुर दर्लामी रहेका छन् ।
जिल्ला प्रहरी कार्यालय सुर्खेतका प्रवक्ता एवं प्रहरी नायब उपरीक्षक प्रदीपबहादुर क्षेत्रीका अनुसार दर्लामी विसं २०५६ कात्तिक ४ गते राति १२ बजे साँझेचौरस्थित जङ्गलमा पैसा माग्दा नदिएको रिसले उनकै गाउँ बस्ने चन्द्रबहादुर राई मगरलाई कुटपिट गरी सख्त घाइते (बेहोस) बनाएका थिए ।
बेहोस बनाइएका राईमगरलाई प्रहरी र स्थानीयवासीको सहायतामा उपचारका लागि सुर्खेत लगिएको थियो । राईमगरको उपचारको क्रममा सुर्खेत अस्पतालमा मृत्यु भएपछि अभियुक्त दर्लामी फरार भएका थिए ।
फरार रहेका दर्लामीलाई खोजतलास गर्ने क्रममा आफ्नै घरमा लुकीछिपी बसेको अवस्थामा फेला पारी प्रहरीले पक्राउ गरेको हो ।
उनलाई जिल्ला अदालत सुर्खेतमा अनुसन्धान कार्यका लागि पेस गरिएको र अध्ययन अनुसन्धानको कारबाही प्रक्रिया अघि बढेको जिल्ला प्रहरी कार्यालय सुर्खेतले जनाएको छ ।
