५ बैशाख, कर्णाली – कर्णाली प्रदेश सरकार, उद्योग, पर्यटन, वन तथा वातावरण मन्त्रालयले भारतीय पर्यटकलाई स्वागत गरेको छ । कर्णाली प्रदेशको मुगुमा अवस्थित रारा ताललाई गन्तव्य बनाएर आज सुर्खेत आइपुगेका भारतीय पर्यटकलाई उद्योग, पर्यटन, वन तथा वातावरणमन्त्री नन्दसिंह बुढाले नेपाली टोपी लगाएर स्वागत गरेका हुन् ।
मन्त्री बुढाले नेपाल र भारतको वर्षौंदेखिको सम्बन्धलाई भ्रमणले प्रगाढ बनाउने विश्वास व्यक्त गरे । “नेपाल प्राकृतिक, धार्मिक, सांस्कृतिक र पुरातात्विक पर्यटनको आकर्षक गन्तव्य हो,” उनले भने, “कर्णाली भाषा, संस्कृति र सभ्यताको उद्गमस्थल हो ।” उद्योग, पर्यटन, वन तथा वातावरण मन्त्रालयका सूचना अधिकारी शेरबहादुर रोकायले १८ भारतीय पर्यटक राराताल अवलोकन गर्न आएको जानकारी दिए । ‘होटल सेन्ट्रल प्लाजा कोहलपुर’ र ‘वर्ल्ड अफ ओभरल्याण्ड एडभेन्चरस’को समन्वयमा भारतीय पर्यटक राराताल घुम्न आएका हुन् ।
