२३ वैशाख ,डोटी । आदर्श गाउँपालिका वडा नं १ मेलगडामा रोगाी बाख्राको मासु खाँदा १५ जना बिरामी परेका छन् ।
केही महिना पहिले उक्त गाउँपालिकामा फैलिएको अज्ञात रोगका कारण दर्जनौँ चौपाया मरेका थिए । त्यही अज्ञात रोगले बिरामी परेका बाख्रा काटेर खाँदा गाउँले बिरामी परेको दिपायल पिपल्लास्थित शैलेश्वरी अस्पतालका तथा चिकित्सक तथा निर्देशक आइजङ्ग कुँवरले बताएका छन् ।
“स्थानीयवासीले खाएको बाख्रामा केही न केही रोग भएको हुनुपर्छ”, उनले भने , “बाख्रामा रोग भएका कारण मासु खाने जति बिरामी परेका हुन् ।” रोग लागेको बाख्रा नपोलेर काँचै खाएका कारण मानिस बिरामी भएको चिकित्सकको भनाइ छ ।
बिरामी १५ जनामध्ये १३ जना उपचारपछि घर फर्किएका छन् भने दुई जनाको अवस्था भने गम्भीर रहेको र अहिलेसम्म पनि कुनै सुधार हुन नसकेको उपचारमा संलग्न चिकित्सकले बताए।
बाख्राको मासु खाँदा गाउँ नै बिरामी परेपछि त्यसको कारणबारे अनुसन्धान गरिने सहायक प्रमुख जिल्ला अधिकारी टेकनाराण पौड्यालले बताए ।(रासस)
