विश्व स्वास्थ्य दिवसको अवसर पारेर यही चैत २४ गते आइतबारको दिन ‘लियो क्लब अफ काठमाडौं, लाजिम्पाट चौतारी’ द्वारा दक्षिणी धादिङको बिकट चेपाङ बाहुल्य बस्तीमा नि:शुल्क स्वास्थ्य सिबिर सम्पन्न गरेको छ ।
कार्यक्रम लियो क्लब लाजिम्पाटको आयोजना तथा गजुरी गाउँपालिका ४ नम्बर वडाको समन्वयमा सम्पन्न भएको हो ।
पृथ्वी लोकमार्गको आदमघाटबाट दक्षिणतर्फ २३ किलोमिटर कच्ची बाटो उकालो चढेपछि पुगिन्छ, गजुरी गा.पा. – ४ गैरिगाउँ पिडा, धादिङ स्थित ‘श्री पिन्डेश्वरी मा.वि. ।
भिरालो पाखामा कतै-कतै देखिने अधिकांस स-साना झुप्राहरुमा एउटा मात्रै कोठा छ, जसको एक कुनामा छ, दाउरा बाल्ने चुलो । अनि बाँकी भुइँमा लस्करै सुत्छन्, ४-५ जना बालबच्चा सहितको परिवार ।
त्यहाँ न बिजुलीबत्तीको सुबिधा छ, न कुनै स्वास्थ्य केन्द्र । शिविरको टोली कार्यक्रमस्थलमा पुग्दा स्थानीय बासिन्दाको बाक्लो उपस्थिति भैसकेको हुन्छ । कुनै ढिला नगरी शिविर सुरु हुन्छ । धमाधम गाउँले मुहारहरू उपस्थित हुन थाल्छन् । सामान्य देखी ठुला-ठुला समस्याहरू लिएर मान्छेहरू आइरहेका हुन्छन् ।
बिहान १० बजेबाट सुरु भई बेलुकी ३:३० सम्म चलेको सिविरमा गैरिगाउँ, चिउरीखर्क, दरिङ्गाल र आसपासका ३०० भन्दा बढीले निशुल्क आफ्नो स्वास्थ्यको परिक्षण गराएका थिए ।
साथै, आवश्यक औषधि पनि निःशुल्क रुपमा वितरण गरिएको थियो । उपस्थित गाउँले वासिन्दा सबैलाई बिस्कुट र फ्रूटी पनि बितरण गरियो ।
कार्यक्रम पछि अबिर, फुलमाला, खादा तथा पुष्पगुच्छाद्वारा शिविर सञ्चालक टोलीलाई विदाइ गर्दागर्दै स्थानीयहरुको अनुहारमा कार्यक्रमप्रतिको उत्साह र यसको प्रभावकारिता प्रष्ट देख्न सकिन्थ्यो ।
