चैत २१ भद्रपुर, । झापामा बुधबार बसेको जिल्ला विपत् व्यवस्थापन समितिको बैठकले बारा र पर्साका हुवाहुरी पीडितलाई राहत प्रदान गर्ने निर्णय गरेको छ ।
प्रमुख जिल्ला अधिकारी जनकराज दाहालको अध्यक्षतामा बसेको बैठकले स्थानीय तहका नगरपालिकाबाट न्यूनतम रु दुई–दुई लाख, गाउँपालिकाहरुबाट रु एक–एक लाख सङ्कलन गरेर राहत पठाउने निर्णय गरेको हो । झापामा आठ नगरपालिका र सात वटा गाउँपालिका रहेका छन् । स्थानीय तहबाट सङ्कलित रु २३ लाख र स्थानीय सङ्घसंस्थाबाट प्राप्त रकम बारा जिल्ला विपद् व्यवस्थापन समितिको कोषमा पठाइने प्रजिअ दाहालले जानकारी दिए।
बुधबार नै नेपाल रेडक्रस सोसाइटी झापा शाखाले रु एक लाख २७ हजार २०० बारा रेडक्रस सोसाइटीको राष्ट्रिय वाणिज्य सङ्घमा रहेको खातामा जम्मा गरिदिएको सोसाइटी झापाका सभापति लोकराज ढकालले बताए।
