चैत १७ गतेदेखी बजारमा आएको कवि तथा समालोचक महेश पौड्यालको कविता संग्रह “शून्य प्रहरको साक्षी”ले पाठकको अथाह माया पाइरहेको छ । फेसबुक लगायतका सामाजिक सञ्जालमा सबैजनाले पुस्तकबारे निकै सुन्दर प्रतिक्रियाहरू दिइरहेका छन् ।
कवि पौड्यालले कवितामा बिम्ब र प्रतीकलाई कुन हदसम्म खेलाउन सकियो भन्नेमा स्पष्ट नभएको अवस्थामा पुस्तकले पाठकसमक्ष विमर्श प्रस्तुत गरेको जनाएका छन् ।
समीक्षक मोमिलाले पौड्यालका कविताहरुबारे बोल्ने क्रममा वेदका ऋचाजस्तो सुललित र गम्भीर प्रकारका भएको टिप्पणी गरेकी छिन् ।
त्यस्तै कवि श्यामलले कविताको भूमि उर्वर र रहस्यमयी भएको उल्लेख गर्दै पौड्यालका कवितामा चित्रमय प्रस्तुति र दार्शनिक चेत पाइएको बताएका छन् ।
त्यसैगरी कवि डा नवराज लम्सालले पौड्यालका कविताहरु नाराजस्तो नभई समय र संवेदनालाई छुन सक्ने प्रकारको भएको बताउँदै लेखकले लेख्नका लागि लेख्ने नभई लेखकीय र मानवीय दायित्व एवं जिम्मेवारीसमेत बोध गरेर लेख्नुपर्नेमा जोड दिएका छन् ।
यो पनि पढ्नुहोस्ः
महेश पौड्यालका पाँच कविता
पौड्याल समालोचना र अनुवाद विधामा समेत कलम चलाउँछन् । संग्रहमा उनका १०८ कविता समावेश छन् । पुस्तक शिखा बुक्सबाट प्रकाशित भएको हो ।
यसअघि पौड्यालको उपन्यास ‘तादी किनारको गीत’, कथासंग्रह ‘त्यसपछि फुलेन गोदावरी’ लगायत आधा दर्जन बालसाहित्यका कृति प्रकाशित छन् ।
हेर्नुहोस् ‘शून्य प्रहरको साक्षी’ले पाएको पाठक मायाः
