कैलालीको टीकापुरमा आठजनाको ज्यान जाने गरी भएको घटनाको मुख्य योजनाकार रहेको अभियोगमा कारागारमा रहेका रेशम चौधरीले बिहीबार ३ बजे सांसदको सपथ ग्रहण गर्ने भएका छन् ।
सिंहदरबारमा रहेको सभामुखको कार्यकक्षमा सभामुख कृष्णबहादुर महराले चौधरीलाई पद तथा गोपनीयताको सपथ गराउने संसद् सचिवालयले जानकारी गराएको छ ।
डिल्लीबजार कारागारमा रहेका चौधरीलाई प्रहरीले सिंहदरबारस्थित सभामुख कृष्णबहादुर महराको कार्यालयमा ल्याउने र सपथ गराएर कारागार लैजाने तयारी छ।
२०७४ फागुन १४ गते अदालतमा हाजिर भएका उनलाई पुर्पक्षका लागि थुनामा राखिएको थियो । थुनामा रहेका उनी त्यही अनसन सुरु गरेका थिए । अनसनमा अस्वस्थ भएपछि २०७४ फागुन २३ गते काठमाडौँ ल्याइएको थियो । काठमाडौँमा उनको उपचार वीर अस्पतालमा भइरहेको थियो । उनले त्यहाँ पनि अनसन सुरु गरेका थिए । राजपा नेपालको दबाब पछि चाँडै शपथग्रहण गराउने भन्दै प्रधानमन्त्री केपी ओलीको निर्देशनमा गृहमन्त्री रामबहादुर थापाले उनलाई जुस खुवाएर अनसन तोडाएका थिए ।
चौधरीले अनसन तोडेपछि शपथग्रहणमा ढिलाइ भइरहेको थियो । ढिलाइका भएको भन्दै राजपा नेपालले पटक पटक प्रधानमन्त्री ओलीलाई दबाब दिँदै आएको थियो । सोही दबाबका कारण प्रधानमन्त्री ओली उनलाई सपथ खुवाउन तयार भएको बताइएको छ ।
सभामुख महराले भने “मैले पहिलेदेखि मेरो कार्यालयमा आउनुहुन्छ भने चौधरीलाई सपथ खुवाउँछु भनेको थिएँ, सरकारले उहाँलाई कार्यालयमा ल्याउँछ भने म सपथ खुवाउँछु, निर्वाचन आयोगले उहाँले जितेको प्रमाणपत्र दिएको छ। उहाँमाथि लागेका मुद्दासँग सपथको कुनै सरोकार छैन।”
‘प्रतिनिधिसभा नियमावली २०७५’ को नियम २४४ को उपनियम ३ अनुसार नैतिक पतन देखिने फौजदारी मुद्दामा पुर्पक्षका लागि थुनामा रहेका सदस्यले सांसदको हैसियतमा कुनै पनि काम गर्न नपाउने उल्लेख गरिएको छ । त्यस्तै उपनियम ४ मा फौजदारी मुद्दामा अदालतको अन्तिम फैसला नआएसम्म र कैदमा बसेको अवस्थासम्म सांसद पद स्वतः निलम्बन हुने उल्लेख छ ।
प्रतिनिधिसभामा कैलाली क्षेत्र नम्बर एकबाट भारी मतले प्रत्यक्षमा निर्वाचित चौधरी चुनावअघि देखि नै भूमिगत थिए । चुनाव जितिसकेपछी चौधरीले पछि अदालतसमक्ष आत्मसमर्पण गरेका थिए ।
