१४ मङ्सिर, पोखरा – गण्डकी प्रदेशका मुख्यमन्त्री पृथ्वीसुब्बा गुरुङले मुलुकको समृद्धिका लागि मौलिकतामा आधारित शिक्षा नीति आवश्यक रहेको बताएका छन् ।
शिक्षा, विज्ञान तथा प्रविधि मन्त्रालय, उच्चस्तरीय राष्ट्रिय शिक्षा आयोगद्वारा आज यहाँ आयोजित सुझाव सङ्कलन कार्यशाला कार्यक्रममा उनले व्यवसायिक र प्राविधिक शिक्षाको खाँचो रहेको बाताए । मुलुकमा अधिकारको लडाई समाप्त भएको उल्लेख गर्दै उनले गुणस्तरीय शिक्षाका लागि राजनैतिकरुपमा गठित सङ्घ सङ्गठन आवश्यक नरहेकोमा जोड दिए ।
प्रदेशका सामाजिक विकासमन्त्री नरदेवी पुनले दक्ष र निष्ठावान् शिक्षकबाट मात्र गुणस्तरीय शिक्षा प्राप्त गर्न सकिने उल्लेख गरे । पठनपाठनमा अङ्ग्रेजी भाषालाई बढी महत्व दिएर मातृभाषालाई कमजोर बनाउन नहुनेमा जोड दिँदै उहाँले सङ्घ सरकारले शिक्षा क्षेत्रमा लगानी बढाउनुपर्नेमा जोड दिए ।
प्रदेशसभा सदस्य रामजी बराल, राजीव पहारी र मनबहादुर गुरुङले परीक्षा प्रणाली समय सापेक्ष बनाइनुपर्ने बताए । कार्यक्रममा शिक्षा मन्त्रालयका सहसचिव दीपेन्द्र काप्ले, प्रमुख जिल्ला अधिकारी चक्रबहादुर बुढा लगायतले गुणस्तरीय, व्यावसायिक र प्राविधिक शिक्षा नीतिमा समेटिनु अपरिहार्य रहेको उल्लेख गरे ।
