दोशल्ला

• मिसन बराल

एक हुल मान्छे

बिदाई का हातहरु

अनि दोशल्ला !

अहँ, मनले मान्दैन मेरो

आखिर दोशल्ला के का लागि ?

बधाई या बिदाइ ?

पुरस्कार थाप्न जाँदा

ओडाइदिए दोशल्ला मलाई

त्यही दोशल्ला,

जुन आज

बिछोडिएर जाने मान्छेलाई

पहिर्याइ दिदैछन् ।

म सोच्छु आखिर

यो दोशल्ला केका लागि

बधाई या बिदाइ ?

संकीर्ण सोच हाम्रो

माला र दोशल्लाले

सम्मान गरिन्छ कसैलाई

जब उ जान्छ यो देश छोडी,

तर जब उ फर्कन्छ त्यहाँबाट

अहँ कोहि आउदैनन्

दोशल्ला लिएर उसलाई स्वागत गर्न ।

म सोच्न थाल्छु

आखिर यो दोशल्ला केका लागि

बधाई या बिदाइ ?

मान्दैन मेरो मनले जब

ती दोशल्ला अडिन्छन् त्यो कांधमा

आफ्नी आमालाई छाडी जानेको

आफ्नो देशलाई माया मार्नेको ।

लगाउनै छ भने दोशल्ला

लगाइदेउ न

ती हुल मान्छेहरुलाई

जो उनलाई बिदाइ गर्न आएका छन्

जो दिनरात देशका लागि मरिरहेछन्

आफुलाइ

अनि,

आफ्ना रहरहरु मारिरहेछन्

केवल देशलाई जिवित राख्न ।

म सोच्न थाल्छु

आखिर त्यो दोशल्ला केका लागि

बधाई या बिदाइ ???

ooo

ooo

सल्लेरी खबर