- सजु खकुरेल
गूड मर्निङ भन्दै
तिम्रो बिहानको पहिलो नजर
म बन्न नपाए पनि ।
तिम्रो तात्तातो कफी
र
त्यो कफीको स्वादिलो चुस्की संगै
तिम्रो पहिलो मुस्कानमा
मेरो खुलस्त मुस्कान
मिसाउन नपाए पनि,
मञ्जुर छ मलाई ।
‘यु आर लेट’ भन्दै
हतारहतार
तिमीलाइ हतार गराउने स्वर
मेरो नभइ
कोही अरु कै भए पनि ।
कामको ब्यस्ततामा पनि
समय निकालेर ‘ह्याड योर टिफिन’
सहितको कल
कोही अरुकै भए पनि
मञ्जुर छ मलाई ।
दिनभरिको थकाइ मार्न
इभेनिङ वाकमा निस्केका तिम्रा पाइलासँगै
साथै हिंड्ने एक जोडी पाइला
कोही अरुकै भए पनि ।
तिम्रो बद्लीरहने मुड
र
ठट्टयौली चुटकिलाहरुमा गुन्जिएको हाँसो
कोही अर्कैको भएपनी,
मञ्जुर छ मलाई ।
सम्बन्धको नाममा
मलाई साथी पनि नमान
मलाई त्यो नि मन्जुर !
किनकि
अाफु भित्र अाफैसंग अल्झिएकी म
सायद स-साना कुरामा रमाउने यो मन
तिम्रो ठुल्ठुला कुरा बुझ्न असमर्थ भयो होला ।
सितल साँझ र खुलस्त आकाशमा
हिंड्न् रुचाउने यी खुट्टाहरु
तिम्रो त्यो बाइकको स्पीडमा
बोर भैहाल्थे होलान् !
दौरा सुरुवाल र भादगाउले टोपीमा
हेर्न तर्सिएका यी आखाहरु
सायद तिम्रो त्यो पश्चिमा शैलीको
स्वादलाई कहिल्यै बुझ्थेनन होलान ।
र अन्त्यमा,
तिमीले कहिल्यै कतै
टाढिनुको कारण सोध्यौ भने
दिन भनी साँचेर राखेका जबाफहरु हुन् यी ।
तर तिमी कहिल्यै
भेटिएलाउ नभेटिएलाउ,
कारण सोध्लाउ नसोध्लाउ !
तर आफैले आफैलाइ पनि
यही प्रश्न गरिरहने भएर होला
आफैलाई सम्झाउन हरेकदिन
यिनै हरफहरुमा नयाँ शब्दहरुको
जाल थप्दै गैरहेकी छु !!!
ooo
ooo
