काठमाडौं। विभिन्न गम्भीर अपराधमा पटक पटक दोषी ठहर भएर सजाय काट्दै आएका एक अपराधीले आफू जेलबाट छुटेको भोलिपल्टै एक महिलालाई बलात्कार गरेर एचआइभी सारिदिए ।
त्यसलगत्तै उनले एक १३ वर्षकी बालिकालाई पहिले अपहरण गरे । त्यसपछि उनले बालिकालाई बलात्कार गरेर हत्या गरे । ती अपराधीले महिलालाई बलात्कार गरेको ८ दिनपछि बालिकाको हत्या गरेका थिए ।
द सनको रिपोर्टअनुसार ३८ वर्षका अलेक्जेन्डर ब्रेजनेभ रुसका हुन् । उनले आफ्नो जीवनको करिब आधा समय जेलमा बिताइसकेका छन् । उनी यसअघि लुटपाट, चोरी र अरुको शरीरलाई गम्भीर चोट पुर्याएको अभियोगमा पटक पटक दोषी ठहर भइसकेका छन् । अदालतमा भएको सुनुवाइको क्रममा बताइएअनुसार उनी यसअघि ८ पटक दोषी ठहर भएर जेल सजाय सुनाइसकिएका व्यक्ति हुन् ।
उनले आफू जेलबाट छुटेको भोलिपल्ट गएको जुन १६ का दिन एक बयस्क परिचित महिलालाई बलात्कार गरेका थिए । उनले महिलालाई आफ्नो बारे पुलिसलाई बताए मारिदिने धम्की दिएका थिए । एक रिपोर्टका अनुसार उनलाई आफू एचआइभी संक्रमित भएको समेत थाहा थियो र उनले जानीजानी महिलालाई एचआइभी संक्रमित गराइदिएका थिए ।
अर्को हप्ता उनले १३ वर्षकी स्कुले छात्रा युलिया क्लिमेन्कोभालाई पश्चिमी रुसको तुला राज्यको बोरोडिन्स्की गाउँमा रहेको स्थानीय ‘हाउस अफ कल्चर’ बाट अपहरण गरे । उनले बालिकालाई जंगलमा लगे । जंगलमा बालिकालाई कुटपिट गर्दै बलात्कार गरेको रिपोर्टमा उल्लेख छ । त्यसपछि उनले बालिकालाई पटक पटक चक्कुले हानेर मारेका थिए ।
बालिकाको शव तीन दिनपछि बरामद भएको थियो । त्यसको केही समयमै ब्रेझनेभ पनि पक्राउ परेका थिए । अदालतले उनलाई बलात्कार, यौन हिंसा, अरुलाई एचआइभी संक्रमित गराइदिएको, अपहरण, गम्भीर शारीरिक आक्रमण र बालिकाको हत्याको अभियोगमा दोषी ठहर गरेको छ । एक भिडियोमा अदालतमा उनलाई आजीवन कारावासको सजाय सुनाइएको देखिएको छ । उनलाई कठोर कारावासको सजाय सुनाइएको छ जसअनुसार उनी जेलबाट कहिल्यै पनि निस्किन पाउने सम्भावना रहँदैन । द सनबाट
