५ फागुन, झापा। झापाको भद्रपुरमा एक व्यक्तिले ढुंगा प्रहार गरि पत्नीको हत्या गरेका छन्।
झापा भद्रपुर नगरपालिका–७ बुधकरण टी स्टेटको १० नम्बर क्वाटरमा बसोबास गर्दै आइरहेका अन्दाजी ६० वर्षीय साहिबा उराउले आफ्नै श्रीमती ५७ वर्षीया फूलसीता उराउको हत्या गरेको जिल्ला प्रहरी कार्यालय झापाले जनाएको छ ।
सामान्य विषयमा विवाद हुँदा श्रीमतीलाई टाउकामा ढुंगाले हानेको जिल्ला प्रहरी कार्यालयले बताएको छ।
प्रहरीका अनुसार सोमबार दिउँसो ३ बजे श्रीमान्श्रीमती दुवै जना मदिरा सेवन गरी झगडा गरेका थिए ।
झगडाको क्रममा श्रीमान्ले श्रीमतीको टाउकोमा ढुंगा प्रहार गरेका थिए । श्रीमान्को ढुंगा प्रहारबाट गम्भीर घाइते भएकी उनलाई तत्काल उपचारका लागि मेची प्रादेशिक अस्पताल भद्रपुर लगिएको थियो ।
प्रहरीका अनुसार उपचारक्रममा उनको मृत्यु भएको थियो । हत्या आरोपी साहेबा उराउलाई झापा अदालतबाट म्याद थप गरी आवश्यक अनुसन्धान प्रक्रिया अघि बढाइएको प्रहरीले जनाएको छ ।
