१ फागुन, बुटवल । नेपाल कम्युनिष्ट पार्टी (नेकपा) ओली समूहले शनिबार (आज) बुटवलमा शक्ति प्रदर्शनसहित आमसभा गर्ने भएको छ।
शनिबार बुटवल–७ को सिद्धेश्वर माविको मैदानमा हुने उक्त शक्ति प्रदर्शनमा ओली समूहले २ लाख जनता उतार्ने बताइएको उक्त सभामा प्रधानमन्त्री ओलीले सम्बोधन गर्ने भएका छन्।
माघ २८ मा दाहाल-नेपाल समूहले काठमाडौँमा शक्ति प्रदर्शन गरेकै दिन मुख्यमन्त्री शंकर पोखरेलले सामाजिक सञ्चालमा एकै प्रदेशको विशाल सभा कस्तो हुन्छ हेर्न बुटवल आउनु भन्दै कटाक्ष गरेका थिए ।
बुटवलमा बिहीवार आयोजित पत्रकार सम्मेलनमा उनले भने, ‘भन्नलाई २ लाख होइन । यर्थाथमै २ लाख जनता सहभागी हुनेछन् । १ लाख जनता रुपन्देहीका र १ लाख प्रदेशका विभिन्न जिल्लाबाट सहभागी हुनेछन् । बुटवलको सभा यथार्थमै ठूलो सभा हुनेछ ।’
सभा शुरू हुनुपूर्व अस्पताल लाइनको खाली जग्गामा जम्मा भएर राजमार्ग चौराहा हुँदै बुटवल–७ को सिद्धेश्वरी माविको खेल मैदानमा सभा हुनेछ ।
मुख्यमन्त्री पोखरेलले नयाँ निर्वाचनबाटै देशमा आइपरेको संकट हल हुने बताएका छन् । ‘जनमतमा जाने कुरा लोकतन्त्रको आधारभूत पक्ष हो,’ मुख्यमन्त्री पोखरेलले भने, ‘हामी जनतालाई न्यायाधीश बनाउन चाहन्छौं । ओलीलाई तानाशाही भन्नेलाई चुनावले फैसला गरेर देखाउँछ ।’
