२४ माघ, काठमाडौं । बुधवार विद्यालयबाट घर फर्किने क्रममा परिवारसँग सम्पर्कविहीन भएकी १७ वर्षीय किशोरी मृत अवस्थामा फेला परेकी छिन्।
बैतडीको दोगडाकेदर गाउँपालिका ७ की १७ वर्षीय भागरथी भट्ट मृत अवस्थामा फेला परेकी हुन्। बिहीबार स्थानीयले मृत अवस्थामा देखेपछि प्रहरी घटनास्थलमा पुगेर अनुसन्धान सुरु गरेको जिल्ला प्रहरी कार्यालय बैतडीका प्रहरी निरीक्षक जनकबहादुर धामीले जानकारी दिए।
लुगा च्यातिएको, हात काटिएको, शरिरमा निलडाम र घाटीमा समेत निलडाम भएको अवस्थामा शव फेला परेको उनले बताए । हत्या गरेर जंगलमा फालेको उनका आफन्तले बताएका छन ।
उनी बुधवार दिउँसो करिब साढे २ बजेतिर विद्यालयबाट घर फर्किने क्रममा सम्पर्कविहीन भएकी थिइन्। घरवाट करिव १ घण्टाको पैदल दुरीमा रहेको सनातन धर्म सिरकोट माध्यमिक विद्यालयका उनी अध्ययनरत थिइन् । वुधबार घरबाट विद्यालय गएकी भट्ट साँझ घर फर्किनन् ।
घर नफर्केपछि उनको खोजी गर्दा साँझ ५ बजेतिर लवलेक जंगलमा फेला परेको मृतकका आफन्त शिवराज भट्टले बताएका छन । घर र विद्यालयको बिचमा पर्ने जंगलमा उनको शव फेला परेको हो । सडकवाट करिव ५० मिटर तल उनको शव फेला परेको प्रहरीले बताएको छ ।
प्रमुख जिल्ला अधिकारी मोहनराज जोशीसहित सरकारी वकिल, जिल्ला अस्पतालका चिकित्सक, सशस्त्र प्रहरीको टोली शुक्रबार बिहान घटनास्थल पुगेका छन्। प्रमुख जिल्ला अधिकारी जोशीले किशोरीको बलात्कारपछि हत्या भएको अनुमान गरिएको जानकारी दिए।
