एजेन्सी । कमेडियन कपिल शर्माको ‘द कपिल शर्मा शो’ बन्द हुने अवस्थामा पुगेको छ ।
यो शोमा अतिथीका रुपमा आउन बलिउड तथा साना पर्दाका जोकोही कलाकार लालयित हुन्छन् र आएर आफ्नो फिल्मको प्रमोसन गर्छन् । कोभिड–१९ को महामारीका कारण केही समय बन्द भएको यो शो पुनः सुचारु भइरहेको छ । तर अब भने शोको यो सिजन सकिने तयारीमा छ ।
सोनी टिभीले पछिल्लो समय कपिल शर्मासँग भएको सम्झौता नवीकरण गर्नेतर्फ कुनै चासो देखाएको छैन । शो निरन्तर टिआरपीमा तल झरिरहेको अवस्थामा कपिलको स्वास्थ्यमा पनि समस्या देखिएपछि सोनी टिभी यो शो बन्द गर्ने मुडमा पुगेको छ ।
शो पूरै बन्द हुन लागेको हैन, यो सीजन मात्र अफ एयर हुन लागेको हो । यसको आधिकारिक घोषणा छिट्टै हुँदैछ ।
नेटफ्लिक्समार्फत कपिल शर्मा डिजिटल डेब्यू गर्न लागिरहेका छन् । उनले यसको घोषणा आफ्नो इन्स्टाग्राम अकाउन्टमार्फत गरेका छन् । द कपिल शर्मा शोका मेकरहरूले नयाँ सीजन आउने भरोसा दिएका छन् ।
