११ माघ, काठमाडौं। विदेशमा कोरोना भाइरसको संक्रमणबाट थप ९ जना नेपालीको मृत्यु भएको छ।
गैरआवासीय नेपाली संघ (एनआरएनए) का अनुसार यो साता बेलायतमा चार जना, कुवेतमा तीन जना, पोर्चुगलमा एक जना र मलेसियामा एक जनाको मृत्यु भएको हो।
गैरआवासीय नेपाली संघअन्तर्गतको स्वास्थ्य समितिका अनुसार कोरोनाले २० देशमा ३ सय २७ नेपालीको मृत्यु भएकोछ ।
संघको स्वास्थ्य समितिका संयोजक सञ्जिव सापकोटाका अनुसार शनिबार साँझसम्म विभिन्न ५० देशमा रहेका ५६ हजार २६ जना नेपालीमा कोरोना संक्रमण देखिएको छ । तीमध्ये ५३ हजार ४ सय ३२ जना कोरोना मुक्त भएका छन् । यो कुल संक्रमितको ९५ प्रतिशत हो ।
सो आधारमा एक महिनामा औसतमा आठ हजार नेपाली संक्रमित हुने गरेको समितिका संयोजक सञ्जिव सापकोटाले जानकारी दिए। एक महिनाको अवधिमा औसतमा चार हजार जना नेपाली संक्रमणमुक्त हुने गरेको सापकोटाले बताए।
