७ माघ, कास्की । होटलमा लगेर एक छात्राको परीक्षा लिएको आरोपमा प्रधानाध्यापकसहित तीन जना शिक्षक पक्राउ परेका छन् ।
पोखरा महानगरपालिका–१ पुरानो टुँडिखेलस्थित राष्ट्रिय माध्यामिक विद्यालय कास्कीका ३ जना शिक्षकलाई प्रहरीले पक्राउ गरेको छ ।
पक्राउ पर्नेमा प्रधानाध्यापक ४८ वर्षीय सूर्य तिवारी, शिक्षकहरु ४१ वर्षीय घनश्याम रेग्मी र ४० वर्षीय शिरीष कुमार बस्ताकोटी छन् । उनीहरुले आफ्नै विद्यालयकी छात्रालाई अंग्रेजी र शैक्षणिक विधिको परीक्षा होटलमा लगेर गराएको प्रहरीले जनाएको छ ।
प्रहरीका अनुसार उनीहरुले कक्षा ११ को ऐच्छिक अंग्रेजी र शैक्षणिक विधि विषयक आंशिक परीक्षामा सोही विद्यालयकी एक छात्रालाई परीक्षा केन्द्रभन्दा बाहिर होटलमा लगेर अमर्यादित रुपमा परीक्षा लिएको आरोप छ ।
उनीहरु उपर शिक्षा ऐन अन्तर्गत मुद्दामा जिल्ला अदालत कास्कीबाट ५ दिन म्याद भई आवश्यक अनुसन्धान प्रकृया अगाडि बढाइएको जिल्ला प्रहरी कार्यालय कास्कीले जनाएको छ ।
