एजेन्सी।इण्डियन प्रिमियर लिग (आईपीएल) अन्तर्गत सोमबार राती भएको खेलमा रोयल च्यालेन्जर्सले सुपर ओभरमा मुम्बई इन्डियन्सलाई पराजित गरेको छ।
पहिले ब्याटिङ थालेको बैंगलोरले २०१ रन बनाएपछि लक्ष्य पछ्याउने क्रममा मुम्बईले ५ विकेटको नोक्सानीमा २०१ रननै बनाएपछि खेल बराबरीमा पुगेको थियो।
सुपर ओभरमा मुम्बईले पहिले ब्याटिंग गर्दै दिएको ८ रनको लक्ष्य बैंगलोरले छैठौ बलमा जितेको हो।
मुम्बईले जितको लागि बैंगलोरलाई ८ रनको लक्ष्य दियो। अन्तिम बलमा कोहलीले बुम्राहको लोअर फुल टस बललाई चौका प्रहार गर्दै टिमलाई जिताए।
२०२ रनको लक्ष्य पछ्याउने क्रममा मुम्बईको सुरुवात राम्रो हुन सकेन। ३९/३ को अवस्थाबाट इशान किशन र हार्दिक पान्ड्याले चौथो विकेटको लागि ३९ रनको साझेदारी गरे। छैठौं नम्बरमा ब्याटिंगमा आएका काइरन पोलार्ड र किशनले त्यसपछि मुम्बईको ब्याटिंग सम्हाले। पहिलो शतक बनाउन मात्र १ रनले चुकेका किशनले ५८ बलमा २ चौका र ९ छक्का प्रहार गरे। पोलार्डले अविजित ६० रन बनाए जुन क्रममा २४ बलमा ३ चौका र ५ छक्का प्रहार गरे।
