एजेन्सी। क्यारेबियन प्रिमियर लिग ( सिपिएल ) मा डिफेन्डिङ च्याम्पियन बार्बेडोस लिगको सेमीफाइनलबाट बाहिरिएसंगै जमैका २ खेल बाँकी रहँदै सेमीफाइनलमा स्थान बनाउन सफल भएको छ। बार्बेडोससंगै सेन्ट किट्स एन्ड नेभिस पेट्रिएट्स पनि सेमीफाइनल पुग्न असफल भएको छ।
शुक्रबार बिहान भएको खेलमा गायना अमेजन वारियर्सले बार्बेडोस ट्राइडेन्टलाई ६ विकेटले पराजित गरेको हो।
ट्रिनिडाड स्थित ब्रायन लारा क्रिकेट स्टेडियममा सम्पन्न खेलमा बार्बेडोसले दिएको ९० रनको लक्ष्य गायनाले १४.२ ओभरमा ४ विकेट गुमाएर पुरा गर्यो। शिमरन हेटमायरले अविजित ३२, चन्द्रपौल हेमराजले २९ तथा रस टेलरले अविजित १६ रन बनाउदै गायनालाई जित दिलाए।
यस अघि टस हारेर पहिले ब्याटिङ थालेको बार्बेडोसले २० ओभरमा ९ विकेटको नोक्सानीमा ८९ रन बनाएको थियो।
गएराति जमैका र सेन्ट किट्स बीचको खेल वर्षा बाधक बन्दा नतिजाविहिन भएपछि दुवै टिमले १/१ अंक बाँडेका थिए।
