एजेन्सी । बार्सिलोनाका अर्जेन्टाइन सुपर स्टार लियोनल मेसी यो सिजन बार्सिलोना मै रहने भएका छन् । स्पेनिस मिडियाहरूले उल्लेख गरे अनुसार मेसी सम्झाैता अवधि नसकिएसम्म बार्सिलोना मै बस्ने भएका हुन् ।
सम्झाैता अनुसार मेसी सन् २०२१ को सिजन अन्त्यसम्म बार्सिलोना नै बस्नुपर्ने हुन्छ ।
मेसी बार्सिलोना मै बस्नका लागि उनका पिता जर्ज मेसी र कानुनी सल्लाहकारले सल्लाह दिएको बताइएको छ ।
केहीदिन अघि मेसी यसै सिजन बार्सिलोना कुनै हालतमा छोड्ने मनसायमा थिए । तर, बार्सिलोना उनको सम्झाैता रद्द गर्ने पक्षमा नदेखिएपछि मेसीको बार्सिलोना छोड्ने चाहनामा धक्का लागेको थियो ।
मेसी पनि बार्सिलोनाबाट सुखद् बहिर्गमनको आशामा बसिरहेका छन् । आगामी सिजन सकिएपछि मात्रै बार्सिलोना छोड्ने भएपछि मेसीले बार्सिलोनाबाट भव्य बिदाइ पाउन सक्नेछन् ।
अर्को सिजन बार्सिलोना छोड्न मेसीलाई सहज हुनेछ । यो सिजन मेसीले बार्सिलोना छोड्नु परेको खण्डमा उनलाई भित्र्याउने क्लबले ७०० मिलियन पाउण्ड खर्च गर्नुपर्ने थियो ।
यति मोटो रकम रिलिज क्लज भएकै कारण मेसी बार्सिलोना बसाइ लम्ब्याउन बाध्य भएका हुन् । अर्को सिजन उनको क्लबसँगको सम्झाैता सकिने हुँदा उनी फ्रिमा बार्सिलोना छोड्न सक्नेछन् ।
