असार ७, काठमाडौं । कुवेत सरकारले घोषणा गरेको आममाफी कार्यक्रममा सहभागी भइ हाल कुवेतको विभिन्न क्याम्पमा रहेका नेपालीहरूलाई स्वदेश फर्काउने काम भइरहेको छ । यस क्रममा आज कुवेतबाट काठमाडौं आउने जजीरा एयरवेजको आठौँ उडान सम्पन्न भएको छ ।
कुवेतका क्याम्पहरूमा रहेका बाँकी नेपालीहरुलाई पनि नेपाल तथा कुवेत सरकारका सम्बन्धित निकायहरूसँग समन्वय गरी क्रमशः स्वदेश फर्काउँदै गरेको आज एक विज्ञप्ति जारी गर्दै कुवेतमा रहेकाे नेपाली दूतावासले बताएको छ ।
क्याम्पमा रहेका र क्याम्प बाहिर रहेका विभिन्न कंपनी तथा अन्य क्षेत्रमा कार्य गरी नेपाल फर्कनै पर्ने अवस्थामा भएका नेपालीहरुलाई शीघ्र नेपाल फर्काउन दूतावासले सम्बन्धित निकायहरूसँग परामर्श र समन्वय गरी रहेको र चाँडै उडान शुरू गर्न सघाउ पुर्याउने उद्देश्यले संभावित यात्रुहरूको नामावली समेत दूतावासको वेबसाइट र फेसबुक पेजमा प्रकाशित गरिरहेको छ । साथै, छुटेकाहरूको नामावली पनि क्रमशः प्रकाशित गर्ने दूतावासले विज्ञप्तिमा जनाएको छ ।
