जेठ ३१, काठमाडौं । कलाकारको कुनै सीमा हुँदैन । उनीहरु एउटा सीमामा बस्दैनन् । उनीहरुको लागि सारा विश्व नै घर हो । वसुधैव कुटुम्बकमको नारा लगाइ हिँड्छन् । तर, केही कलाकारहरु भने कलाको नाममा कालो धब्बा हुन्छन् । उनीहरुले आफ्नो इज्जतको ख्याल गर्दैनन् । कलाकार भनेका राष्ट्रका गहना हुन् । उनीहरुले जुनसुकै क्षेत्रमा पनि बोल्दा हर शब्दको ख्याल गर्नु पर्दछ ।
हालचाल भारतीय कलाकार अदनान सामी विवादित भएका छन् । हुन त उनी विवादमा मुछिएका हुन्छन् । यो उनको स्वभाव होला तर अरुको देशको सार्वभौमिकता विरुद्ध आँच आउने खालका व्यवहार अक्षम्य हुन् ।
अदनान सामीले एसियन न्यूज इन्टरनेसनलको एक ट्वीटमा सिंह र बिरालोको फोटो राखी कोट गरेका छन् । उक्त कोटमा उनले क्याप्सनमा डियर नेपाल सिरियस्ली लेखेका छन् ।
उक्त ट्वीटलाई लिएर उनलाई धेरैले आलोचना गरेका छन् । सयद मुकदर बुखारीले उनलाई उनी पाकिस्तानमा जन्मिएर पनि सच्चा पाकिस्तानी हुन नसकेको कसरी भारतीय हुन सक्यो भनी आलोचना गरेका छन् ।
अदनानको जन्म पाकिस्तानको लाहोरमा भएको थियो । भारतमा टुरिस्ट भिजामा आएका उनी मिति थप्दै बलिउडमा आफ्नो करिअर बनाए । सन् २०१५ मा उने पाकिस्तानी भिजा त्यागी भारतीय नागरिक बनेका थिए । उनले आफूलाई सच्चा भारतीय प्रमाणित गर्न बेला बखतमा पाकिस्तान विरुद्ध विभिन्न विवादित अभिव्यक्तिहरु पनि दिएका थिए ।
