गुल्मी । स्थानीय सरकारको नियम थाहा छैन भन्दै अवैध रुपमा बालुवा उत्खनन गर्ने गुल्मीका दुई जना युवालाई गाउँपालिकाले कारबाही गरेको छ ।
जिल्लाको मालिका गाउँपालिका वडा नम्बर पाँच छापहिले र वडा नम्बर दुई दर्लिङको बिचमा रहेको निस्ती खोलाबाट अवैध रूपमा बालुवा उत्खनन गर्न छापहिलेका भिम विष्ट र दुर्गा कार्कीलाई १०/१० हजार रुपैयाँ जरिवाना असुलेको गाउँपालिकाका प्रमुख प्रशासकीय अधिकृत दिपक भण्डारीले सल्लेरी खबरलाई बताए । प्रति ट्याक्टर रोयल्टी लिन बाँकी रहेको र उनीहरुलाई जरिवानाबापत् १०/१० हजार जरिवाना गरेको वडाध्यक्ष श्यामलाल गिरीले जानकारी दिए ।
स्थानीय भिम विष्ट र दुर्गा कार्कीले स्थानीय विकासका योजनाको लागि अवैध रूपमा बालुवा उत्खनन गरेका थिए । सल्लेरी खबरबाट समाचार सम्पेषण भएसँगै गाउँपालिकाले चासो देखाएको थियो । तत्कालै कानूनको दायरामा ल्याउने वचन दिएको मालिका गाउँपालिकाले कोरोना भाइरसका कारण कारबाही प्रक्रियामा केही ढिला भएको बताएको छ । यता मालिका गाउँपालिकाका प्रमुख प्रशासकीय अधिकृत दिपक भण्डारीले सल्लेरी खबरलाई धन्यबाद दिएका छन् ।
गाउँपालिकाले असुलेको जरिवानाको रसिद
उनले भने, “हामीलाई अवैध रुपमा बालुवा उत्खनन गरेको कुरा थाहा थिएन मिडियाले जानकारी गराई स्थानीय सरकारले गर्नु पर्ने काम गरिदिएको छ ।”
यता गाउँपालिकाका सूचना अधिकृत जगत पौडेलले पनि गैरकानुनी काम गर्ने जो सुकै पनि कारबाहीको दायरामा आउने बताएका छन्। साथै गाउँपालिकालाई सचेत र जानकारी गराएको भन्दै धन्यबाद व्यक्त गरेका छन् । मालिका गाउँपालिकाको नियम अनुसार प्रति ट्याक्टर बालुवाको लागि पाँच सय रुपैयाँ कर तिर्नु पर्छ । केही दिन पहिला अवैध रूपमा बालुवा उत्खनन गर्दै गरेको अवस्थामा सल्लेरी खबरले फेला पारे पछि शक्ति र सत्ताको आडमा अवैध धन्दा स्थानीय सरकाको मुख बन्द भन्ने समाचार सम्प्रेषण गरेको थियो ।
याे पनि पढ्नुहाेस्
खड्का सल्लेरी खबरका लुम्बिनी प्रदेश सम्बाददाता हुन् ।