काठमाडौं । बलिउडमा लामो समय काम गरेकी नेपाली कलाकार मनिषा कोइरालालाई अहिले भारतीय मिडियाहरुले उछितो काटिरहेका छन् । नेपाल सरकारले पारित गरेको नयाँ नक्सा सम्बन्धमा ट्वीट लेख्दा मनिषामाथि भारतीय मिडियाहरु खनिएका हुन् ।
परराष्ट्रमन्त्री प्रदिप ज्ञवालीको ट्वीटमा रिट्वीट गर्दै मनिषाले हाम्रो सानो देशको आत्मसम्मान कायम गर्न सकेकोमा धन्यवाद भन्दै तीन महान देशहरुबीच शान्तिपूर्ण र सम्मानपूर्ण संवादका लागि आशावादी भएको बताएकी थिइन् ।
मनिषाले गरेको यहीं ट्वीटकाे विषय लिएर भारतीय मिडियाहरुले खेदो खनिरहेका छन् । भारतीय टेलिभिजन एबीपीले भारतको खाने अनि चीनको गाउने भन्दै समाचार प्रसारण गरेको छ । उक्त समाचारमा मनिषाले चीनको इशारामा ट्वीट गरेको पनि बताइएको छ ।
मनिषाले सन् १९९१ को हिन्दी चलचित्र सौदागरबाट बलिउडमा डेब्यू गरेकी थिइन् । तर त्यो भन्दा पहिला सन् १९८९ मा फेरि भेटौँला नामक नेपाली कथानक चलचित्रमा उनले काम गरिसकेकी थिइन् । त्यसपछि उनी बलिउडमै खेल्न थालिन् । उनले ६५ भन्दा बढी हिन्दी चलचित्रमा काम गरिसकेकी छिन् ।
