पछिल्लो समय निकै नै चर्चा परिचर्चा बटुल्न सफल नायक विराज भट्टले निर्देशन गरेको चलचित्र ‘साङ्लो’को दोश्रो गीत ‘झ्याम्मै आँखा झ्याम्मै’ गीत चोरीको आरोप लागेको छ । चलचित्र ‘रुद्रप्रिया’का निर्देशक सुदीप भुपाल सिंहले गीतका शब्द चोरी गरेको आरोप लगाएका हुन् । 
गीतका शब्द चोरीको आरोप लगाउँदै सुदीपले संगीतकार सुरेद अधिकारी, गायक निशान भट्टराई र विराज भट्ट प्रोडक्सनविरुद्ध उजुरी दिएका छन् । रचनाकार सुदिपले गीतमा आफ्नो शब्द प्रयोग गरिएको भन्दै महानगरीय प्रहरी परिसर टेकुमा उजुरी दिएको जानकारी दिए।
प्रहरी परिसर टेकुका अनुसार आइतबार दुवै पक्षलाई छलफलका लागि बोलाइएको छ । सुदीपले ‘रुद्रप्रिया’ का लागि गीत कम्पोज गर्न २ वर्ष अगाडि सङ्गीतकार अधिकारीलाई दिएको बताएका छन् । तर चलचित्रमा यो गीत समावेश नगरिएपछि गीत सङ्गीतकार अधिकारीसँगै रहेको उनले बताएका छन् ।
यता विराजले भने यो गीत आफूले सुरेश अधिकारीसँग लिएको र उक्त गीतबारे आफूलाई थाहा नभएको प्रतिक्रिया दिए । उनले फिल्मका लागि संगीतकार अधिकारीसँग गीतबारे कुरा गरेको बताए ।
गीतमा रचनाकारमा निशानको नाम पर्नु प्राविधिक त्रुटि भएको निर्देशन अभिनेता विराजले बताएका छन् । उनले गीत चोरेर आफ्नो चलचित्रमा नभै सङ्गीतकार सुरेशसँग सम्झौता गरेरै गीत लिएको बताएका छन् । उनले आफूलाई गीत सङ्गीतकार सुरेशले नै लेखेको बताइएको भनेका छन् ।
