३० भदौ, सोलुखुम्बु । सोलुखुम्बुको लुक्लामा तीन दिनदेखि मौसम प्रतिकूल भएका कारण प्लेन उड्न नसक्दा दर्जनौं विदेशी पर्यटक अलपत्र परेका छन् ।
नागरिक उड्डयन प्राधिकरण लुक्लाका प्रमुख इमानाथ अधिकारीका अनुसार, शुक्रबार २० वटा उडान तालिका भएतापनि कुनै उडान हुन नसकेको विमानस्थल कार्यालयले जनाएको छ । शनिबार पनि २५ वटा उडान तालिकामध्ये पाँच वटामात्रै उडान भएको थियो भने आइतबारका लागि ३० वटा उडान तालिका भए पनि एउटै उडान हुन सकेको छैन ।
आइतबारका लागि तारा एयरको १५ सीताको १० र समिटकोे पाँच गरी ३० वटा उडान तालिका रहेको थियो । बाक्लो हुस्सुका कारण हेलिकप्टरले समेत उडान भर्न नसकेपछि थप समस्या भएको छ ।
लुक्लाका प्रमुख अधिकारीका अनुसार खुम्बु क्षेत्र भ्रमणमा आएर काठमाडौं फर्कने करीब ३०० भन्दा बढी पर्यटक लुक्लामा नै रोकिएका छन् ।
