शरीरमा ताजापन ल्याउनका लागि पर्याप्त निन्द्रा निक्कै आवश्यक हुन्छ । दिनभरि कामले शरीर तथा मस्तिष्क थाकेपश्चात जो कोहिलाई पनि मीठो निद्राको जरुरि हुने गर्दछ । दैनिक ब्यस्त जीवनमा स्वास्थ्य रहनका लागि कम्तिमा पनि दिनमा ७ देखि ८ घण्टा सुत्नु अति आवश्यक देखिन्छ । समयमा सुतेर तथा समयमै उठ्दा दिनभरि शरीर स्वास्थ्य रहनुका साथै मस्तिष्कले पनि सही तरिकाले काम गर्न गर्दछ ।
दैनिक आठ घन्टा भन्दा धेरै सुतेर पनि कहिले कहीँ निन्द्रा नपुगेको अनुभब हुन सक्छ । कहिले भने निन्द्रा पुगे पनि शरीर थाकेको जस्तो अल्छि हुन्छ भने यसका विभिन्न कारणहरु हुन सक्छन् । शरीरमा दीर्घकालीन रोग, खराब बानी, अस्वस्थ्य भोजन, अनियमित दिनचर्या, थाइरोइड, तनाव आदि थकानका मुख्य कारण हुन् । स्वास प्रस्वासमा समस्या हुँदा, शरीरमा रगतको कमी आउदा तथा रगतमा हेमोग्लोबिनको स्तर घट्दा पनि दिनभरि केहि काम नगरी थकाई लागेको जस्तो महसुस हुन्छ ।
स्वास्थ्य रहनका लागि आफ्नो खानपान र दैनिक कार्यमा ध्यान दिन सकेमा दिनभरीको थकानलाई सजिलै हटाउन सक्छौं । थकान तथा हाईलाई हटाउनका लागि सकेसम्म दिनमा अत्यधिक पानी पिउने बानी बसाल्नु पर्छ । खानपानमा ध्यान दिदै दैनिक खानेकुरामा हरियो सागपात र विभिन्न तरकारीहरुलाई समेट्नु पर्छ ।
बिहान छिट्टो उठेर ३० मिनेट देखि १ घण्टा जति व्यायाम गर्दा वा बिहानको शितल हावामा डुल्दा गर्दा स्वास्थ्यलाई निकै फाइदा पुग्न सक्छ । शारीरिक ब्यायामले शरीरलाई दिनभरि ऊर्जाशील बनाउनुका साथै दिनभरी लाग्ने थकानलाई समेत हटाउन मद्दत गर्छ । ब्यायाम गरिसकेपछि बिहान चिसो पानीले नुहाउने गर्दा शरीर शितल हुनुका साथै शरीरमा ताजापन आउने गर्छ ।
शरीरको थकाइ हटाउनका लागि कालो चिया, ग्रिन टि वा ताजा फलफुलको जुस पिउनु राम्रो उपाय हो । बिहान मनतातो पानीमा कागती र मह राखेर पिउने गर्दा थकान कम लग्नुका साथै शरीरमा तुरुन्तै ऊर्जा आउछ । शरीरमा थकाइ अनुभव भएजस्तो लाग्दा केहि बेर हिड्ने गर्दा, हात र गोडामा मालिश गर्दा केहि हद सम्म कम हुने गर्छ ।
