किन गर्ने बगैँचामा काम? यस्ता छन् कारण

आफ्नो घर वरपर फुलैफुलले भरिएको बगैँचाको दृश्य हेर्न कसलाई पो मन नपर्ला र? जुन घरमा विभिन्न रङ्गहरूका फुलहरूको बगैँचा हुन्छ l त्यस घरले प्रत्येक व्यक्तिलाई आकर्षित गर्ने गर्छ l यदि तपाइको घरमा बगैँचा छ भने घरको सुन्दरता नै फरक किसिम हुन्छ l बगैँचा एउटा त्यस्तो थलो हो l जहाँ मानिसहरू दिन बिताउन चाहन्छन् l झन् कतिपय मानिसहरू त दिनभरि नै बगैँचामा काम गरेर आफ्नो दिन कटाउने गर्छन् l तर के तपाईँलाई थाहा छ, बगैँचामा काम गर्ने बानीले रमाइलो अनुभूति दिलाउनका साथै यसले स्वास्थ्यलाई पनि धेरै फाइदा पुर्‍याउँछ ।

खुसी बढ्छ
यदि तपाईँ आफ्नो बगैँचामा केही चिज जस्तै कि फुल वा फल रोप्नु हुन्छ भने यसले तपाईँलाई फरक किसिमको आनन्द वा खुसी दिलाउने गर्छ l त्यसैले आफ्नो बगैँचामा विभिन्न किसिमको फुलहरू रोप्ने गर्नुहोस् l

बलियो दिमाग
एक अनुसन्धान अनुसार बगैँचामा काम गर्ने व्यक्तिको दिमाग बगैँचामा काम नगर्ने व्यक्तिको दिमाग भन्दा तेजिलो हुने गर्छ l बगैँचामा काम नगर्ने व्यक्तिमा बिर्सने रोग लाग्ने सम्भावना पनि छिट्टो हुन्छ । त्यसैले बगैँचामा काम गर्नु उपयुक्त मानिन्छ l

तनावबाट छुटकारा
यदि तपाईँ बगैँचामा समय बिताउनु हुन्छ भने तनाव मुक्त भई कार्यक्षमता पनि बढ्छ । बगैँचामा काम गर्नाले तपाईँको इम्युन सिस्टम पनि बलियो हुनका साथै व्यक्तिको स्ट्रेस हार्मोनको स्तर पनि कम हुन्छ । त्यसैले दिनमा केही समय बगैँचामा बिताउनु स्वास्थ्यको लागि फाइदाजनक हुन्छ ।

राम्रो व्यायाम
बगैँचामा काम गर्नाले शरीरको राम्रो व्यायाम हुन्छ । बगैँचामा काम गर्दा खन्ने, गोड्ने, सिँचाइ गर्ने जस्ता धेरै गतिविधिहरू गर्नुपर्छ । यी गतिविधिहरूले तपाईँलाई आवश्यक सम्पूर्ण व्यायाम पूरा हुन्छ । यी गतिविधिहरूले शरीरमा रक्तसञ्चार बढाउने काम पनि गर्छ । यदि तपाईँलाई जिम ध्याई राख्न अल्छी लाग्छ भने बगैँचामा काम गर्ने गर्नुहोस् l जसले गर्दा तपाईँ आफ्नो शरीर बनाउन सक्नु हुनेछ l

सल्लेरी खबर