१० जेठ, काठमाडौं । आजबाट सुरु भएको तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगितामा त्रिभुवन आर्मी क्लवले प्रदेश दुई लाई १ सय ७१ रनको फराकिलो अन्तरले पराजित गर्दै विजयी सुरुवात गरेको छ ।
२७९ रनको विजयी लक्ष्य पछ्याएको प्रदेश दुईले ३१.४ ओभरमा सबै विकेटको गुमाउदै १०७ रन मै समेटियो ।प्रदेश २ का लागि हरिशंकर शाहले २१ रन बनाए । त्यस्तै, साम्सद शेखले १६ र शुधिर चौधरीले १५ रन बनाए । अन्य ब्याट्सम्यान खासै चल्न नसक्दा प्रदेश २ ले आफ्नो पहिलो खेलमा नै फराकिलो अन्तरले हार व्यहोर्नु पर्यो ।
बलिङतर्फ शाहब आलमले ९ ओभर बलिङ गर्दै २९ रन खर्चेर चार विकेट हात पारे । त्यस्तै, सुशान भारीले तीन विकेट लिदा जितेन्द्र मुखियाले दुई विकेट लिए ।
टियु क्रिकेट मैदानमा टस हारेर पहिले ब्याटिङको निम्तो पाएको आर्मीले ५० ओभरमा ९ विकेटको क्षतिमा २७८ रन बनाएको थियो । आर्मीको ठूलो स्कोरमा राजु रिजाल, विनोद भण्डारी र रोहित कुमार पौडेलले उत्कृष्ट ब्याटिङ गरे । ओपनिङमा आएका राजु र विनोदले पहिलो विकेटका लागि १२१ रनको साँझेदारी गरेका थिए । क्रिजमा टिकी रहेका राजु ९० रनमा आउट भए ।त्यस्तै आर्मीका लागि रोहितकुमार पौडेलले ४७ रन र हरि चौहानले २६ रन बनाए ।
बलिङतर्फ हरिशंकर शाहले तीन विकेट लिए ।
