८ जेठ, काठमाडौं । बुधबार क्यारेबियन प्रिमियर लिगको ड्राफ्ट लन्डनमा आयोजना हुँदैछ । यसपटक ड्राफ्टमा चार नेपाली खेलाडी पर्न सफल भएका छन् ।
गत साता सार्वजनिक भएको ड्राफ्टमा चार नेपाली सहित कुल २० देश बाट ५ सय ३६ खेलाडी रहेका छन् । नेपालबाट लेग स्पिनर सन्दीप लामिछाने , युवा अलराउण्डर दिपेन्द्रसिंह ऐरी, तीव्र गतिका बलर सोमपाल कामी र मध्यक्रमका ब्याट्सम्यान रोहितकुमार पौडेल ड्राफ्टमा अटाएका छन् ।
गतवर्ष नै सन्दीपले सीपीएल खेलिसकेका छन् भने सोमपाल, रोहित र दिपेन्द्र पहिलो विदेशी लिग खेल्ने योजनामा छन् । नेपाली समयअनुसार बुधबार बेलुका ७ः४५ बजे देखी ड्राफ्ट सुरु हुने बताईएको छ ।
वेस्टइन्डिजमा यस संस्करणको सीपीएल आगमी जुलाई ११ देखी अगष्ट १६ सम्म चल्नेछ । अघिल्लो सिजन सीपीएलमा उत्कृष्ट प्रदर्शन गर्दै उदीयमान प्रतिभा समेत घोषित भएका सन्दीपको छनोट संभावना निक्कै बलियो रहेको छ ।
