२९ वैशाख, काठमाडौं ।
शनिबार लिग वनअन्तर्गत पेरिस सेन्ट जर्मेनले एन्जर्सलाई २-१ ले पराजित गरेको छ । पीएसजीको जितमा एन्जल डी मारिया र नेयमारले गोल गरे ।
घरेलु टोलीविरुद्ध खेलको लागि ड्यानी आल्भेसको क्रसमा डाइभिङ हेडरमार्फत ब्राजिलियन फरवार्ड नेयमारले २० औं मिनेटमा गोल गरेर टोलीलाई अग्रता दिलाए । दोस्रो हाफको ५८ औं मिनेटमा नेयमारको पासमा डी मारियाले गोल गर्दै अग्रता दोब्बर गरे ।
५ मिनेट समय बाँकी रहँदा पीएसजी १० खेलाडीमा समेटियो । मार्किन्होसले विल्फ्रिड कांगालाई पेनाल्टी क्षेत्रभित्र लडाएपछि रेफ्रीले पीएसजीका कप्तानलाई रातो कार्ड देखाए । एन्जर्सका फ्लाभिएन टेटले प्रहार गरेको पेनाल्टी भने जियानलुइजी बुफोनले बचाए । त्यसको ३ मिनेटपछि टेटले गोल गरेपनि नतिजा आफ्नो पोल्टामा पार्न सकेन ।
यसअघि नै लिग उपाधि पक्का गरिसकेको पीएसजीले ३६ खेलमा ८८ अंक जोडेको छ ।
