१७ वैशाख, कैलाली ।
ट्रकको ठक्करबाट एक युवतीको मृत्यु भएपछि कैलालीको लम्की बजार अहिले तनावग्रस्त भएको छ।
ना ७ ख ९२३३ नम्बरको ट्रकले ठक्कर दिँदा १९ वर्षकी सुनिता रावलको मृत्यु भएको थियो। उनको मृत्यु भएपछि आन्दोलनमा उत्रिएका प्रर्दशनकारी र प्रहरीबीच झडप भएको हो।
आन्दोलनकारीले अहिले पनि प्रदर्शन गरिरहेका छन्। जसकारण लम्की बजार तनावग्रस्त छ। सडकमा टायर जलाएर प्रर्दशनमा उत्रिएपछि प्रहरीले प्रदर्शनकारीमाथि अश्रुग्यास र हवाई फायरसमेत गरेको छ। उनीहरुको माग दोषीलाई कारवाही हुनुपर्ने र मृतकको परिवारले उचित क्षतिपूर्ती पाउँनु पर्ने रहेको छ ।
सोही क्रममा रबरको गोली लाग्दा लम्की बहुमुखी क्याम्पसका प्राध्यापक प्रेम मुडभरीको टाउकोमा चोट लागेको छ। झडपमा प्रहरी र आन्दोलनमा उत्रिएका स्थानीय गरी ७ जना सामान्य घाइते भएका छन्।
