१६ वैशाख, काठमाडौं ।
रियल म्याड्रिडका प्रशिक्षक जिनेदिन जिदानले आफ्नो टोलीको खराब प्रदर्शनलाई लिएर समर्थकहरुसँग माफी मागेका छन् । ला लिगा अन्तर्गत आइतबार भएको खेलमा रियल रायो भालेकानोसँग १-० ले पराजित भएको थियो ।
चिर परिचित प्रतिद्वन्द्वी बार्सिलोनाले ला लिगा जित्दा आफ्नो टोलीले खराब प्रदर्शन गर्दा निकै नराम्रो लागेको उनले बताए । यस हारसँगै रियल बार्सिलोनाभन्दा १८ अंक पछाडी पुगेको छ र तेस्रो स्थानमा रहने पक्का भएको छ ।
‘आज हामीले केहि गर्न सकेनौं । पहिलो मिनेटदेखि अन्तिम मिनेटसम्म हामीले निकै खराब फुटबल खेल्यौं । कहिलेकहीं गोल नहुन सक्छ, तर आज हामीले गोलको लागि अवसर पनि सिर्जना गर्न सकेनौं,’ जिदानले निराश हुँदै भने, ‘ हामीले यस्तो प्रदर्शन गर्दा आफैमाथि रिस उठ्नु पर्छ । यो खेलाडी मात्र होइन मेरो पनि जिम्मेवारी हो । समर्थकहरुसँग हामी यस्तो प्रदर्शनका लागि माफी चाहन्छौं ।’
रायोले सन् १९९७ यता रियललाई पहिलो पटक पराजित गरेको हो ।
