नेपाली सिनेमा क्षेत्रका निकै व्यस्त एवम् सुपरहिट नायक हुन् – दयाहाङ राई । उनले अभिनय गरेका ‘लुट’, ‘कबड्डी’ , ‘लाल्टिन’
‘लुट २’ लगायतका चलचित्र ब्याक टु ब्याक सुपरहिट भएका छन् ।
त्यस्तै उनका तीन नयाँ चलचित्र यही जेठ महिनामा रिलिज हुने भएका छन् । उनले अभिनय गरेका ‘जात्रै जात्रा’, ‘दयारानी’ र ‘आप्पा’ रिलिजको तयारीमा छन् ।
१. जात्रै जात्रा
प्रदिप भट्टराईले निर्देशन गरेको चलचित्र ‘जात्रै जात्रा’ मा नायक दयाहाङ राईको दमदार प्रस्तुति रहेको छ । यो चलचित्र पुरै कमेडी कथामा बनेको छ । यसमा उनीसँगै विपिन कार्की, रविन्द्र सिंह बानियाँ, रविन्द्र झा, बर्षा राउत, राजाराम पौडेल, प्रकाश घिमिरे, सोहित मानन्धर लगायतका कलाकारको पनि अभिनय रहेको छ ।
चलचित्र ‘जात्रै जात्रा’ यहि जेष्ठ ३ गतेबाट देशभर प्रदर्शन हुँदैछ ।
२. दयारानी
चलचित्र ‘दयारानी’ मा दयाहाङ राईसँगै नायिका दीया पुनको पनि अभिनय रहेको छ । यस चलचित्रमा दयाहाङ श्रीमान् र दिया श्रीमतीको भूमिकामा रहेका छन् । चलचित्रलाई माओत्से गुरुङले निर्देशन गरेका हुन् ।
‘दयारानी’ यही जेष्ठ १० गतेबाट रिलिज हुँदैछ ।
३.आप्पा
नायक दयाहाङ राइको मुख्य भूमिका रहेको चलचित्र ‘आप्पा’ मा सिद्धान्त राज तामाङ, अल्लोना काबो लेप्चा नायक राईसँग देखिने छन् । चलचित्रलाई अनमोल गुरुङले निर्देशन गरेका हुन् ।
चलचित्र ‘आप्पा’ यहि जेष्ठ २४ गतेबाट नेपालभर प्रदर्शन हुँदैछ ।
