६ वैशाख, काठमाडौं ।
युभेन्टसका स्टार खेलाडी क्रिस्टियानो रोनाल्डो यति बेला इटालियन मिडियामा निक्कै चर्चामा छन् । युभेन्टस युरोपियन च्याम्पियन्स लिगको क्वार्टरफाइनलबाट बाहिरिएपछि क्रिस्टियानो रोनाल्डो निरास बनेका छन् ।
उपाधि जित्ने लक्ष्यका साथ स्पेनिस क्लब रियल म्याड्रिड छाडेर युभेन्टस आएका सुपर स्टार रोनाल्डोले अहिले सम्झौता अवधि नसकिँदै युभेन्टस छाड्ने तयारी गरेको समाचार आइरहेको छ।रोनाल्डोले अर्को सिजनसम्म क्लब छाडिसक्ने इटालियन समाचारपत्रहरुमा उल्लेख गरिएको छ । उनी युभेन्टसको वर्तमान टोलीसँग खेल्न खासै इच्छुक नभएको बुझिएको छ । रोनाल्डो च्याम्पियन्स लिगबाट बाहिरिएपछि धेरै चिन्तित देखएका छन् ।
रोनाल्डो रियलबाट युभेन्टस पुग्दा सम्म उनको स्वागत र सर्मथनमा उत्रिएका त्यहाँका हजारौं सर्मथकले ‘रोनाल्डो हामीलाई च्याम्पियन्स लिग ल्याईदेउ’ भन्दै नारा लगाएका थिए । उनलाई उनको सर्मथकको नाराले समेत अहिले झस्काएको छ । यद्यपी रोनाल्डोको युभेन्टससँगको सम्झौता भने सन् २०२२ सम्म रहेको छ ।
