५ वैशाख, काठमाडौँ । दक्षिण कोरियाली फरवार्ड ह्युङ मिन सनको दुई गोलसंगै टोटेनहम हट्सपरले बुधबार च्याम्पियन्स लिगको सेमिफाइनलमा स्थान सुरक्षित गरेको छ । म्यानचेस्टर सिटीको घरेलु मैदानमा ४-३ ले पराजित भएपनि अवे गोलको आधारमा टोटेनहम अन्तिम चारमा पुगेको हो ।
सनले च्याम्पियन्स लिगमा कीर्तिमान भने पहिले नै रचिसकेका थिए । पहिलो लिगमा १-० को जित निकाल्दा एकमात्र गोल गरेका सनले च्याम्पियन्स लिगमा सर्वाधिक गोल गर्ने एसियन खेलाडीको रुपमा आफूलाई परिचित गरिसकेका छन् । उनले हालसम्म च्याम्पियन्स लिगमा १२ गोल गरिसकेका छन् । यसअघि उक्त कीर्तिमान डिनामो किएभबाट खेल्ने उज्बेकिस्तानका माक्सिम शात्सिकको नाममा रहेको थियो ।
सनले यस सिजन स्पर्सका लागि सबै प्रतियोगितामा २० गोल गरिसकेका छन् । ह्यारी केनको अनुपस्थितिमा टोटेनहमको आक्रमण सम्हाल्दै गोल गर्ने जिम्मेवारीलाई कुशलतापूर्वक वहन गरेका छन् ।
