२ बैशाख, काठमाडौं ।
प्रिमियर लिग अन्तर्गत आइतबार चेल्सी विरुद्ध लिभरपुलले २-० को जित निकाल्दा इजिप्सियन गोल स्कोरर मोहम्मद सलाहको भूमिका निक्कै नै महत्वपूर्ण रह्यो।
५१ औं मिनेटमा जोर्डन हेन्डरसनको पासमा साडियो मानेले लिभरपुललाई अग्रता दिलाएका थिए । त्यसको दुई मिनेटपछि सलाहले उत्कृष्ट गोल गर्दै घरेलु टोलीको अग्रतालाई दोब्बर बनायो ।
पूर्व क्लब चेल्सी विरुद्ध गोल गरेपछि सलाहको सेलिब्रेसन हेर्न लायक थियो । सलाहले चेल्सीका समर्थक सामु त्यो गोल सेलिब्रेसन गरेका थिए ।उनको त्यो सेलिब्रेसन उनका आलोचकका लागि दिइएको जवाफको रुपमा लिइएको छ ।
केहि समयअघि सलाहका आलोचकले उनको धर्मलाई प्रहार गर्दै भिडियो सार्वजनिक गरेका थिए । ती समर्थकलाई चेल्सीले पनि प्रतिबन्ध लगाएको थियो । सलाहले एक खुट्टामा उभिएर दुवै हात जोडेर गरेको त्यो सेलिब्रेसनलाई सोही घटनासँग जोडेर हेरिएको छ ।
