कुनै समयका निकै चर्चित नायक हुन् – रमित ढुंगाना । उनका ‘बुद्ध वाज बर्न इन नेपाल’, ‘धड्कन’, ‘देवर बाबु’ लगायतका चलचित्र सुपरहिट भएका थिए । लामो समय फिल्मी दुनियाबाट हराएका रमित धेरै समय पछि नेपाली चलचित्र ‘राजा साहेब’ ल्याएर कम-ब्याक भएका छन् । स्रोतका अनुसार रमितले यस चलचित्रमा १८ लाख पारिश्रमिक लिएको भनिएको छ ।
यसमा चलचित्र ‘रणवीर’बाट डेब्यु गरेकी नायिका सुपुष्पा भट्टलाई नायिकाको रुपमा अफर गरिएको छ ।
फिल्ममा खेल्ने-नखेल्ने भन्ने सवालमा नायिका सुपुष्पाले भनिन्,”चलचित्रको छायांकनको समयमा मेरो परिक्षा पर्ने भएकाले म अझै कन्फर्म छैन । हेरौ के हुन्छ !”
निर्माणपक्ष भने नायिकाको चयनमा जुटेका छन् ।
चलचित्रमा रमित ढुंगाना, जयकिशन बस्नेत, सुभाष मेचेलगायतका कलाकार कन्फर्म भइसकेका छन् भने अन्य कलाकारको चयनमा निर्माणपक्ष जुटिरहेका छन् । चलचित्रलाई सरु राईले निर्माण गर्दै छिन् भने विचल राईले निर्देशन गर्न लागेका हुन् ।
‘राजा साहेब’ को छायांकन यही बैशाखबाट सुरु हुने निर्देशक राईले सल्लेरी खबरलाई बताएका छन् ।
