भारतमा जारी १२ औं संस्करणको इण्डियन प्रिमियर लिग (आईपीएल) क्रिकेटको आइतबार राती सम्पन्न २१ औं खेलमा क्रिस लीनको अर्धशतकमा कोलकत्ता नाइट राइडर्स विजयी भएको छ ।
यो जितसँगै कोलकाता अंक तालिकाको शीर्ष स्थानमा पुगेको छ ।
१४० रनको लक्ष्य पाएको कोलकत्ताले १३ ओभर ५ बलमा २ विकेट गुमाउँदै लक्ष्य पुरा गरेको हो । जयपुरमा टस हारेर ब्याटिङ गरेको राजस्थान रोयल्सले निर्धारित २० ओभरमा ३ विकेट गुमाएर १३९ बनाएको थियो ।
कोलकताको जितका लागि क्रिस लीनले अर्धशतकीय पारी खेले । उनले ३२ बलमा ३ छक्का र ६ चौकाको मद्दतले ५० रन बनाएका थिए । त्यसैगरी सुनिल नाराइनेले ४७ रन र रोविन उथप्पाले २५ रन जोडेका थिए ।
राजस्थानका लागि श्रेयस गोपालले २ विकेट लिएका थिए ।
त्यसअघि राजस्थानका लागि स्टिभ स्मिथले अर्धशतकीय पारी खेलेका थिए । उनले ५९ बलमा नटआउट ७ चौका र १ छक्काको मद्दतले ७३ रन बनाएका हुन् । यस्तै जोस बट्लरले ३७ रन जोडे ।
कोलकताका लागि ह्यारी ग्रोनीले २ विकेट र प्रसिद कृष्णले १ विकेट लिए ।
