इण्डियन प्रिमियर लिग (आईपीएल) अन्तर्गत हिजो राती सम्पन्न दिल्ली क्यापिटल्स भर्सेस कोलकत्ता नाइट राइडर्सको भिडन्तमा नेपाली लेग स्पिनर सन्दीप लामिछानेको टिम दिल्लीले सुपर ओभरमा जित हासिल गर्न सफल भएको छ ।
दिल्लीस्थित फिरोज कोट्ला स्टेडियममा कोलकत्ताले दिएको १८६ रनको लक्ष्य पछ्याएको दिल्लीले २० ओभरमा ६ विकेट गुमाएर १८५ रन जोडेपछि खेल सुपर ओभरमा गएको थियो ।
सुपरओभरमा दिल्लीले एक विकेटको क्षतिमा १० रन बनाउन सफल भयो । ११ रनको चुनौती पछ्याएको कोलकत्ताले ७ रन मात्रै बनाउन सफल भएपछि दिल्लीले खेल जितेको हो । उक्त खेलमा दिल्लीका युवा ब्याट्सम्यान पृथ्वी शले अर्धशतकीय इनिङ्स खेलेका थिए । शतक बनाउन एक रनले चुकेका पृथ्वी ५५ बलमा ९९ रन जोडेर आउट भए ।
कोलकत्ताविरुद्ध नेपाली शान सन्दीप लामिछानेले उत्कृष्ट प्रदर्शन गर्दै ४ ओभरमा २९ रन खर्चिएर १ विकेट लिए । साथै उनले एक खेलाडीलाई रन आउट पनि गराए ।
अघिल्ला दुई खेलमा बेन्चमै रहेका सन्दीपले कोलकत्ताविरुद्धको खेलमा उत्कृष्ट प्रदर्शन गरे । उनले दिल्लीका लागि सबैभन्दा राम्रो बलिङ गरे ।
जितसँगै दिल्लीले ३ खेलबाट ४ अंक जोड्दै लिगको दोस्रो स्थानमा रहेको छ भने कोलकत्ताले पहिलो हार व्यहोर्दै ४ अंक बनाएको छ । कोलकत्ता दुई जीत सहित शीर्ष स्थानमा छ ।
फोटो क्रेडिट : आईपीएल
