आजभन्दा ५० वर्ष अघि सन १९६७ मा प्रकाशित महान् साहित्यकार एवम् साहित्यमा ‘जादुयी यथार्थ’का प्रणेता गाब्रियल गार्सिया मार्खेजको विश्वप्रसिद्ध उपन्यास ‘वन हन्ड्रेड इयर्स अफ् सोलिच्युड’ अब छिट्टै नेट-फ्लिक्समा सिरिजको रुपमा आउने भएको छ । यो उपन्यास पहिलोपल्ट यसरी स्क्रिनमा आउन थालेको हो ।
नोबेल पुरस्कार विजेता लेखक मार्खेजलाई योभन्दा पहिले पनि यसै उपन्यासका लागि मुभीका अफर नआएका होइनन् । तर उपन्यासको विषयवस्तुलाई केवल एउटा या दुईवटा फिल्मले न्याय गर्न नसक्ने भन्दै उनले लगातर ती अफरहरू इन्कार गरिरहे ।
यसपल्ट भने नेट-फ्लिक्सको टिम मार्खेज परिवारको चित्त बुझाउन सफल दरिएको छ । मार्खेजका दुई सुपुत्र रोड्रिगो र गोन्जालो पनि यसका निर्माता हुने नेट-फ्लिक्सले बताएको छ ।
उपन्यासलाई सिरिज बनाउन अनुमति दिएको विषयमा बोल्दै रोड्रिगोले भनेका छन्,”पछिल्लो समयमा विश्वमा नेट सिरिजको क्रेज असाध्यै बढिरहेको छ । अझ नेट-फ्लिक्सको उदयसँगै विस्तारै मान्छेहरूमा विदेशी भाषाका सिरिजहरू सब-टाइटलको मद्दतले हेर्ने संस्कृतिको विकास भएको छ । त्यसैले पनि हाम्रो परिवार बुबाको उपन्यासमा आधारित रहेर सिरिज बनाउने निर्णयमा पुगेको हो ।”
उक्त सिरिज उपन्यासको ओरिजिनल संस्करणको स्पेनिश भाषामा बन्नेछ ।
नेट-फ्लिक्सका स्पेनिश भाषा विभागका उप-प्रमुख फ्रान्सिस्को रामोसले भनेका छन्,”हामीले यसअघि पनि नेट-फ्लिक्सबाट ‘नार्कोस’ सिरिज तथा ‘रोमा’ फिल्म स्पेनिश भाषामा बनाइ सकेका छौं । अझ ‘रोमा’ले यसपालीको ओस्कार अवार्डमा ‘उत्कृष्ट विदेशी भाषाको चलचित्र’ द्वारा सम्मानित भए सँगै हामीमा विदेशी भाषाका (स्पेनिश) चलचित्र बनाउने थप हौसला मिलेको छ ।”
‘वन हन्ड्रेड इयर्स अफ् सोलिच्युड’ लाई ल्याटिन अमेरिकी साहित्यको मास्टरपिसको रुपमा हेर्ने गरिन्छ, जसले मार्खेजलाई ल्याटिन अमेरिकाबाट विश्वसाहित्य क्षितिजमा स्थापित गरिदियो । अहिलेसम्म यसको संसारका विभिन्न देशका ४६ भन्दा बढी भाषामा अनुवाद भइसकेको छ भने झण्डै ५० मिलियन प्रति बिक्री भइसकेको छ ।
आख्यानमा कलात्मक कल्पनाशीलता र जादुमयी लेखन शैलीले विश्वका आम पाठकलाई सर्वाधिक आकर्षित गर्न सफल लेखक हुन् – गाब्रियल गार्सिया मार्खेज । १७ अप्रिल २०१४ मा यो संसारबाट बिदा लिएता पनि उनी आफ्ना कृति मार्फत अझै सर्बत्र फैलिएका छन् । लेखनीमा उनले सबैभन्दा पहिले जादुयी यथार्थ शैली भित्र्याएको मानिन्छ । उनी कथाकार मात्रै नभएर एक कुशल पत्रकार तथा स्क्रिनराइटर पनि थिए ।
मार्खेजका प्रमुख कृतिमा ‘वन हन्ड्रेड इयर्स अफ् सोलिच्यूड’, ‘क्रोनिकल अफ् अ डेथ फोरटोल्ड’, ‘लभ इन द टाइम अफ् कोलेरा’, ‘द अटम अफ प्याट्रिआर्क’ रहेका छन् । उनी बिसौँ शताब्दीका महान लेखकमा गनिन्छन् । सन् १९८२ मा उनलाई साहित्यतर्फको नोबेल पुरस्कार समेत प्रदान गरिएको थियो । अहिलेसम्म उनका कृतिमा आधारित थुप्रै हलिउड चलचित्र बनिसकेका छन् ।
नेट-फ्लिक्सले बनाउन लागेको मार्खेजको उपन्यासमा आधारित सिरिजका लागि कसले लेख्ने भन्ने टुङ्गो अझै लाइनसकेको भए तापनि ल्याटिन अमेरिकी साहित्यका दिग्गज साहित्यकारको प्रयोग गरिने निर्माण टिमले जनाएको छ । सिरिजको सुटिङ कोलम्बियामा हुनेछ ।
रामोस भन्छन्,”कोलम्बिया र सम्पुर्ण ल्याटिन अमेरिकाको लागि यो त्यो महत्वपूर्ण स्वर्णीम १०० वर्षको कथा हुनेछ, जसले हामीलाई एक महादेशको रुप दिलायो । र हामीलाई विश्वास छ कि यो सिरिज सम्पुर्ण विश्वभरका लागि नै जादुयी उपहार बन्नेछ ।
प्रस्तुती : राजन के.सी.’प्रमोद’
०००
०००
